政圈有兩位阿太鬥法，結果陳四萬大勝，真正新的一頁。
立法會補選玩完，輪到娛樂圈頒獎選舉接力。每年新人都爭崩頭，今年女將由黑妹鍾舒漫（Sherman ）鬥大眼江若琳（Elanne ）。兩派對壘，鍾舒漫靠熱力舞姿，江若琳出嗲功，愈近頒獎禮，戰意愈濃，23歲鍾舒漫最後拉票趕出新碟，更晒長腿兼D Cup 咪衝擊江若琳，講嗲唔夠大眼妹，不過鍾舒漫跳得又睇得，今次江若琳要告急喎！
先騷42"腿
勁歌熱舞唔係人人舞得掂，讀過吓番書嘅鍾舒漫自4歲開始學琴，至今已考8級鋼琴，16歲又去學hip hop 舞，筋骨柔軟至叻擺高難度pose 。
後晒深咪
05年暑假由美國返港睇牙醫，無厘頭參加咗新秀仲嗱埋金咪大獎，跳得之外，仲有前歌舞團嘅媽咪遺傳，把聲夠power ，好易認！除咗靚聲，32D 上圍唔使加墊已經好有睇頭。
胸戰迫近
20歲江若琳細Sherman 3年，sell 大眼可愛，係今年同Sherman 爭女新人獎嘅最強對手。最近Elanne 的胸前底線亦慢慢下降，一於撼過。
之前攬實
同是07年新人獎候選者，9月時二人仲friend 過打band ，不過臨到頒獎禮，早前江若琳曾暗寸Sherman 做「黑人」，再加上二人屬不同黨派，搞到近日少咗聯絡囉！
每年大堆新人湧現樂壇，要彈出就要玩形象靠造型，先至叫潮。港女愛美白，偏偏23歲鍾舒漫愛黑，膚色愈黑愈有運行喎。
有幸幫Edison 影輯靚相做宣傳，Sherman 梗係唔介意搏到盡啦！
一黑一白
鍾舒漫天生「黑妹」，而勁敵江若琳則賣大眼、白白淨，一黑一白，更是年尾新人獎的大對手。上週為本刊拍照的Sherman ，穿上低胸裝，D Cup 上圍甚有睇頭，且甫士愈見星味。面對勁敵，Sherman 話：「其實我哋真係冇不和，私底下同Elanne 都算傾得埋，會講吓電話同玩MSN ……不過之前真係傾得密啲，唔知呢，可能愈近頒獎禮，大家都有啲緊張掛，所以冇玩得咁埋囉！」
細鍾舒漫3年，20出頭的江若琳，總給人嬌滴滴感覺，嗲功尤其厲害，講嘢陰聲細氣尾音特長，逢仔都俾她的「大眼」電親；反而曾在英國、美國留學的Sherman ，鬼妹仔性格屬爽朗自然派，「我真係好男仔頭㗎，入行之前，我唔多著裙添！（咁你會唔會學佢咁嗲？）嘩，我唔夠佢嗲……其實佢都係cute 啫！始終大家都唔同style 。」
以快打慢
面對外間將二人比較，Sherman 感無奈。「其實我唔可以阻止人哋對我嘅睇法，不過Elanne 係乖乖女、斯文嗰隻；而我就跳嚟跳去，一個動，一個靜囉。不過我黑就易認啲啦！（邊個唱歌好啲？）我只可以話我聲底比較厚，powerful 啲，可能係遺傳啦，我可以唱多啲唔同種類嘅歌。」
年頭憑跳到甩肺的〈高手過招〉正式踏入樂壇，再憑慢歌〈好好擁抱〉延續，歌迷會亦已成立。經常著熱褲背心跳勁舞，接了同公司Yumiko 的棒，怕唔怕成為新一代少男性幻想對象？「唔會啦，我同佢（Yumiko ）走唔同路線㗎，我係外國啲；而Yumiko 係女性化，中國啲㗎，所以取代唔到佢嘅！唔好講性啦，一講我就啞咗！每個人都有唔同觀點角度，不過我都有少少女人味嘅！」
形容自己性格剛強，男仔頭嘅Sherman ，拍攝當日著起短裙同tube top 都渾身不自然，但睇到影完出嚟嘅相就笑晒口讚靚，男仔頭都有女仔一面！
變黑之前
05年嗱新秀金咪大獎同老闆楊受成敬酒時，鍾舒漫唔算好白，但相比起而家就差好遠。「我之前去咗印度做嘢，自己又冇刻意去做防曬，所以黑晒返嚟，不過我覺得幾好喎，易認啲嘛！不過公司唔想我太黑，所以唔會點keep 喇！」
個個有水
英皇老闆楊受成一向篤信風水，以往亦有不少迷信傳聞，如身邊人屬猴，又或是單親家庭的，都會旺住楊生。
07年英皇三位力捧偶像鍾舒漫、洪卓立和泳兒都不約而同地，名字上有三點水，根據堪輿學家麥玲玲表示，楊生應該曾找高人幫三位睇過名。「鍾舒漫原名鍾舒曼，由於命格利水，所以改用漫字有助事業。而洪卓立的名字應該在出生時已找高人睇過，改得好好。而原名陳家欣的泳兒，由於命格同樣利水，所以改做泳兒可加強名氣和事業運。」
兩年冇愛
05年外國留學返港放暑假即參加英皇新秀，無心插柳勝出，自言近2年都冇拖拍，「16歲係我初戀，拍過三次拖，不過唔知點解個個都係拍咗兩年就會分手。（外國猛男係咪特別正呀？）唔係呀，都係香港人，鬼仔又撞唔啱，不過我唔抗拒嘅！」
曾在英美留學的Sherman ，表面open ，其實內里斯文，更試過被朋友出賣友誼：「我係個樂觀嘅人，鍾意啲簡單嘢，同埋最緊要真！（怕唔怕江若琳未必真心同你做朋友呀？）至少我係真心，不過我估佢唔會嘅。」
真friend 又好不和又好，總之頒獎禮分秒必爭，鍾舒漫唔憂冇票呀！
鍾舒漫Sherman
年齡：23
三圍：32D 、24、34
學歷：Band 1嘉諾撒培德書院完成F.5、英國完成A-Level 、美國西雅圖音樂系一年級
後台：英皇娛樂Music Plus （楊受成）
經英皇新秀大賽奪冠入行
唱片銷量：《乖女仔》7,000隻
廣告：大快活（泳兒、袁家怡合作）
化妝品SENSOL 代言人
電影：《戀戀蘇豪》（即將開拍）
出第一張專輯當然要賀一賀啦，Sherman 就選擇咗穿泳衣出海慶祝。佢仲話呢個係佢嘅終極性感呀！
江若琳Elanne
年齡：20
三圍：32B 、23、33
學歷：Band 2真光書院（鴨
洲）
讀至中四（中五畢業於夜校）
後台：寰宇（林小明）
電影試鏡被林太睇中
唱片銷量：《Innocent 》4,500隻
廣告：大家樂（06）、黑人牙膏（06）、巴黎雪完美明眼素（06－07）、多啦Ａ夢卡通月餅（07）
電影：《17歲的夏天》（05）、《嚦咕嚦咕對對碰》（07）、《嚇死你》（07）、《男兒本色》（07）、《愛鬥大》（拍攝中）
江若琳行青春可愛路線，強銷其五蚊電眼，不過時不時就有人唱佢放生電，妒忌掛！
黑妹煞食
雖然江若琳賣大眼又夠嗲，不過本刊響銅鑼灣做街訪，竟然由「唔夠嗲」嘅Sherman 勝出，香港人嘅口味轉咗喇！
街頭後生仔buy 鍾舒漫，在「3男2女」網站的歌星討論區投票都係Sherman 羸，就呢個網上公開投票選三位最愛女新人，Sherman 倍數勝出，勁過陳太贏葉劉喎！
FACE周刊第28期
