爭仔積怨　陳法拉「舞」鬥廖碧兒

爭仔積怨　陳法拉「舞」鬥廖碧兒香港近年興起一片「拉丁」熱，名媛阿太、屋村師奶、大人細路跳個不亦樂乎。一向係機會主義者嘅無線更係食住個勢，無論大騷細騷，拉丁舞幾乎係指定項目，新劇《舞動全城》更係以拉丁舞為賣點。
《舞動全城》除咗連場熱舞場面、性感舞衫同舞姿夠晒吸引外，幾個女角戲外戲內大鬥法更夠睇頭，眾矢之的係姣精陳法拉。陳除咗戲內施姣功同廖碧兒爭仔鬥舞外，戲外亦不時搶廖鋒頭；再加上有傳其向監製施嗲功，成功搶走徐子珊戲份，由大茄變女二號，令徐不滿。劇集好睇，劇外眾女角「全武行」亦有睇頭。
9月10日起逢周一至周五晚8:30pm 翡翠台

如果大家冇善忘嘅話，01年劉德華套《愛君如夢》，都係以拉丁舞作題材。而《愛》開拍時，都傳出梅艷芳同吳君如因為戲份多寡出現面左左問題。無獨有偶，《舞》開拍以嚟，一樣傳出是是非非，而響是非事件入面「揹重飛」嘅，係「姣精一號」陳法拉。

爭仔．搶戲．犯眾憎
據講佢響《舞》劇入面原本屬於第三線，角色係高鈞賢嘅女朋友，但因為佢肯搏又肯露，最重要係得高層開心，就算劇集已開咗鏡，都要將佢同徐子珊角色對調，一跳變成第二女主角兼且加多咗戲份，同廖碧兒鬥「舞」。其實之前傳佢「姣溝」陳豪，已經令廖氣頂，點知今次合作，陳又刻意搶鏡，搞到廖碧兒上加。響舊恨新仇加加埋埋之下，兩個俾佢辣著嘅「阿姐」，夾手夾腳杯葛陳法拉。
劇外古仔已經咁精采，劇情應該唔會弱得去邊啦？事實上，《舞》嘅劇情原來只屬一般。講熱愛跳舞、尤其鍾情拉丁舞嘅廖碧兒，響舞蹈團選拔試前夕，因為馬浚偉而受傷，響選拔賽失準。之後走咗去舞蹈學校教拉丁舞，因為教得好受學生歡迎，就因為咁，同樣係教跳舞嘅陳法拉對佢非常妒忌玩針對。
劇情簡單得嚟，幸好有日劇feel 。加上男女主角馬浚偉、廖碧兒等唔止有觀眾緣，而且夠晒青春活力，跳起舞嚟亦有板有眼。
正所謂：人靚、衫靚、彩色繽紛；夠晒養眼。


拍劇一向比較密實嘅廖碧兒，今次為咗迎戰死敵陳法拉，不時「性感小野貓」上身。雖未致於賣大包，亦足以引死一眾麻甩。

華仔嘅《愛君如夢》，雖然唔可以用「拉丁舞始祖」嚟形容，但亦絕對講得係帶動「拉丁舞潮流」嘅先鋒。

陳法拉因為夠搏、肯露，由開初二線尾三線頭角色一躍變成同女一號廖碧兒平起平坐；而真正有舞蹈底嘅徐子珊慘被削減戲份。

廖碧兒：佢咩料呀？配同我鬥？（設計對白）
徐子珊：連我嘅戲都搶，夠晒狠！（設計對白）