法拉表示家人見過男友，但結婚要等吓。
陳法拉昨日與黎耀祥、黃偉文（Wyman）在圓方出席電影《壞蛋獎門人3》（Despicable Me3）首映禮，他們為該片做廣東話配音。法拉趁美國學校暑假，回流返港工作搵錢，早前落機後便直接到錄音室，結果要經過適應期才錄得出對白，又笑言暑假回港還債，主要出席活動和拍廣告。
廣東話退步
法拉透露早前隨一隊美國攝製隊到家鄉四川，她說：「拍攝內容介紹成都，已經有五至六年冇返去，變化好大，我哋仲周圍去搵好嘢食同食辣嘢。我仍然識得講四川話，反而廣東話有少少生銹，所以我入錄音室要到第三日先至講得好啲。」
這次四川行，法拉表示法國男友Emmanuel Straschnov（司馬諾）未有同行：「佢一路都想去，有機會會一齊去，一路都返學，冇時間去旅行，仲有一年就畢業，屋企人都見過男友，我每個學期會有兩個話劇，屋企人都會嚟支持。」記者笑問法拉是否畢業便結婚？她說：「讀得咁辛苦梗係出嚟拍吓戲先，我讀咗四年，終於可大派用場，𠵱家同男友互相了解，想相處吓先。」
與法拉、祥仔（右二）出席首映的Wyman（左一），表示是自薦為電影配音。
祥仔的兒子在外國讀書，他表示不介意外籍新抱。
祥仔讚兒子
黎耀祥昨出席宣傳後，晚上即返內地工作，昨日父親節，囝囝卻到了日本旅行，祥仔說：「佢有短訊同我講父親節快樂，有冇表示就睇佢去日本有乜嘢收穫，不過咪又係我啲錢，好彩佢都識得衡量，應買則買，價值觀OK。」兒子在外國留學，更已拍拖，女友是舊同學卻非洋妞，祥仔說：「要睇佢本事。不過外國女仔都OK，幾光宗耀祖，促進國際交流，黎家幾難得有個外籍新抱，威晒，我不嬲都好開通，最緊要佢開心，做人係平等冇分種族。」。
採訪：卓寶花
攝影：陳順禎
from:
http://hk.apple.nextmedia ... 170619/20060448
