風流不改 馬德鐘暗會湖南妹周圍𠝹女的馬德鐘，去年背妻拖女遊泰國斷正後，馬太一怒下帶埋囝囝離港定居法國，令他事業直插谷底。為求翻身，馬德鐘惟有翻箍老婆扮恩愛，重建好男人形象。
馬德鐘表面浪子回頭，但其實風流依舊。8月28日，他赴湖南為《舞動奇
》比賽時，一冇老婆跟身，便趁機作反，離大隊偷會一名濃妝艷抹的湖南妹。除了返大陸會女，有華姐更爆料，指大半年前見過39歲的馬德鐘，曾夜訪比佢細16年的楊秀惠香閨。馬生的桃花，真是一浪接一浪。
親密唱K
02年馬德鐘拍攝《再生緣》時，與葉璇一拍即合，有雜誌指二人曾私下約會唱K ，態度親暱。
𠝹盡電視姐仔
由G4特工轉型為電視小生的馬德鐘，憑著其高大威猛的身形，一直獲TVB 力棒，可惜有家室的他，與不少電視姐仔扯上關係，緋聞一大堆，形象大跌。
出入妮竇
馬德鐘和郭羨妮去年拍攝《爭霸》而火速撻著，除了多次被拍到約會外，馬又陪女方買化妝品，更拍得在郭位於西貢的香閨出入，兩人發現記者後，竟齊齊返回電視城扮開工，情況狼狽。
泰國幽會
06年10月被雜誌拍到與圈外女友Katherine 手拖手遊泰國，激到正印老婆張筱蘭帶同9歲囝囝氣走法國。
夜闖佘竇
06年拍攝《鳳凰四重奏》時，馬德鐘被指與佘詩曼假戲真做，更多次被拍到結伴夜蒲，今年中馬更夜闖其香閨替姣佘慶祝生日。
的士攬啜
去年11月被本刊斷正馬攬住嫩口北妹上的士，二人更在車上頭
頭打茄輪。
華姐爆上香閨
其實，先後與郭羨妮及佘詩曼傳緋聞的馬德鐘，近月來經常陪住老婆和囝囝扮好男人，戮力洗底，不過冇老婆在身邊，佢又靜雞雞作反。
除了湖南會女，據一位03年的華姐爆料，馬德鐘大半年前曾幾次夜訪同屆華姐，現受無線力捧的楊秀惠香閨（當時楊與該位華姐租住將軍澳中心，單位乃無線為華姐安排的宿舍），兩人親密關係不言而喻。爆料人話︰「馬德鐘每次都好夜嚟搵楊秀惠，我見過幾次囉，不過我同佢（指楊）住咗幾個月已經飛返加拿大，依家佢哋點就唔知啦。」據知馬德鐘與楊秀惠過從甚密一事，很快就傳到無線高層耳中，4月初，兩人更因此被召往問話。
認約會男方
就馬德鐘夜訪楊秀惠香閨一事，記者向楊秀惠求證，她否認，不過就承認彼此有約會，更鬼拍後尾枕自爆曾因傳聞被無線照肺。
記︰有傳馬德鐘大半年前不時深宵去妳宿舍喎？
楊︰冇咁嘅事，黐線咩！梗唔會啦，公司唔俾㗎。
記︰有個華姐話親眼見過馬德鐘上你宿舍搵你。
楊︰吓？把口生響人度，我冇辦法。
記︰你同馬德鐘咩關係？
楊︰普通朋友囉，大家拍《四葉草》時已經識。嗰陣佢都有教我讀中文。
記︰同馬德鐘熟唔熟？佢有冇約過你？
楊︰都有一兩次，（食飯？）……係……係呀！
記︰點解咁傳？
楊︰我都覺得奇怪，連公司都有問過我，我話︰吓！唔係囉！
記︰公司有向你問話？
楊︰唔只馬生，都傳過我同Wilson （監製錢國偉）啫，我都慣晒。可能係傳緋聞先會紅，或者嚟緊我會升花旦呢。
記︰同馬生仲有冇聯絡？
楊︰冇啦！
之後楊更賣口乖話︰「我暫時唔會拍拖住，樂小姐話要乖，公司俾咁多機會我，我梗係唔會做啲公司唔鍾意嘅嘢。」
馬有備而戰
雖然楊秀惠表示已冇再同馬德鐘聯絡，但記者問完楊秀惠翌日，本刊編輯部已收到身在湖南拍《舞動奇
》的馬德鐘電話，他直指俾人屈，仲話要開記招澄清。
之後本刊記者埋身訪問時，他十分勞氣話︰「上佢（楊秀惠）屋企？嘩，一定冇啲咁嘅事。作嘢嘅嘢，你哋鍾意點寫就點寫。（楊秀惠承認你約過佢食飯。）唔係話約佢，係拍劇收工一齊食飯啫，有其他同事㗎。」
問到他在當地鬼祟離隊會女一事，馬德鐘說︰「食飯囉，就係咁簡單！」記者想再追問時，監製何小慧已經過來為他解圍，拉他上車中止記者訪問。
就楊秀惠與馬德鐘傳緋聞被無線問話一事求證樂易玲，樂表示：「冇呢件事。（但楊惠秀話你哋問過話。）佢一定唔會咁講。」至於監製何小慧，截稿前仍未獲回覆。
入會所撇記者
平治房車開動後，馬德鐘不時向後張望，當他發現有記者跟蹤，車子即加速兼左穿右插，企圖撇甩記者，最後他們將車駛入私人會所，成功甩身。
其實，馬當晚得一小時的晚飯時間，便要返回排舞室，但馬為了陪女伴食飯，他花掉四十分鐘時間撇記者，又花個多小時與女伴短聚吃飯，結果搞到遲到排舞，看來他十分重視是次約會。翌日早上9時許，一班藝人到酒店咖啡廳吃早餐時，馬德鐘被負責帶隊的監製何小慧捉住，坐埋一邊訓話。據知情者說︰「監製知道有記者嚟咗湖南，已經下令班藝人唔准出去玩，食飯都要跟大隊，唔想有任何負面新聞，馬德鐘離隊食飯係先斬後奏，監製梗係嬲啦！」
8月28日下午，馬德鐘抵達長沙市後，便直接到湖南電視台，為節目《舞動奇
》排舞。黃昏6時左右，一名年約廿多歲，打扮冶艷，貌似歌手衛詩嘅女子，駕著平治房車停在電視台門口。該女子落車打完電話唔夠三分鐘，穿上姣婆紅恤衫的馬德鐘就風騷從電視台出來，向兩邊望一望後，便快手快腳上車。
闊面版衛詩
8月28日
鬼祟會女
馬德鐘當日會女前，在化妝間吹頭兼補粉，咁姿整，睇怕佢真係好重視今次約會。
馬德鐘的女人緣一向強勁，今次揸平治房車來接他的，是貌似衛詩的湖南妹。
馬德鐘與女伴發現記者後，即踩油左攝右攝撇記者。
