踏入夏天，報章雜誌又見排山倒海的減肥宣傳廣告，繼抽脂、溶脂後，今年，最激新殺入的，是聲稱可以炸散脂肪的「爆脂」。
不過，本港皮膚科專科醫生經臨床試用後，發現「爆脂」減肥不但效果微乎其微，稍一不慎，瘦身不成，更隨時爆脂爆爛肚。
「想減得舒服，做爆脂啦！呢種係今年最新技術，我哋啱啱響歐洲買咗部機，唔會痛，又無危險，效果最好。」記者以顧客身份，走進吹噓擁有全亞洲首部纖體爆脂機的星妍纖體美容中心，表明要減肥，店務經理Suki 隨即向記者推介爆脂減肥。
Suki 更以一副醫學專家的口
向記者力銷︰「如果你個肚腩有一百粒脂肪，我哋幫你打爛八十粒，剩低二十粒脂肪，脂肪爛咗就唔會生得番，咁你以後點食都唔會肥！」
她更誇口說爆脂比抽脂更有效，「脂肪爛咗就會由淋巴帶走，然後排出體外，一個星期可以爆兩次，人哋做抽脂都係唔想要脂肪，但抽脂痛餐死喎，今年你最好彩，唔使捱抽脂咁辛苦，又要麻醉，又要做手術，見到都嚇死你啦！」
爆走三十磅
最後她拿出計數機，左計右計，指記者若果要減三十磅，整個療程四萬多元。「三個月，你可以爆脂廿五次，我哋有營養師跟進你飲食，個個客都瘦到，一定得。」
除了星妍，必瘦站、向日葵纖體等美容中心紛紛在雜誌大賣廣告，力谷爆脂療程，異口同聲都說這是最新、最舒服的減肥方法。星妍更找來過氣女星梁雪湄做宣傳，引來網上熱烈討論。
爆脂機被講得天花龍鳳，甚至被捧為纖體界神話；不過，曾任港大及中大皮膚科主任的陳衍里卻直指爆脂機名過其實。
陳衍里去年替五十八名人士做爆脂臨床研究，踢爆這個神話，「做咗三個月，七成人話無幫助。只有三成人認為腰圍縮減，當中更只有三成半人認為有減磅。咁你話有無效？」
爛肉潰瘍
最恐怖的是，一名廿六歲、重一百二十六磅的女子爆脂時，竟然爆爛肚，陳講述事發經過，「嗰次係我幫佢做，度好晒位，但佢訓咗上床時郁咗，個位歪咗，佢即時覺得有啲熱熱哋，然後肚皮上面就紅咗一點，出咗個水泡。」該傷口後來因為感染出現爛肉潰瘍。
陳衍里解釋，所謂爆脂，其實是用超聲波聚焦在一點之上，然後溶解脂肪，過程本身有危險，「聚焦個位其實好細，你一定要好準確，如果個位歪咗少少，射咗落去啲骨度，然後反射番上皮膚，咁就變成熱力，會灼傷皮膚，如果反射去肝、血管、神經，咁點算？」
雖然被爆爛的脂肪不會再生，但香港整形及整容外科醫學會副會長馬芳蔭卻指，就算剩下十分之一的脂肪細胞，每個細胞都可以不斷膨脹，令身體暴肥，顯示爆脂減肥並不可靠。
記者翻查文獻，發現爆脂機面世已經有三年，第一部由以色列人發明，叫做Ultra Shape ，當時標榜是全球首部非磨損性的纖體機，是手術以外最快見效的減肥方法，主要在醫院使用。爆脂機售價每部過百萬，每次可以「爆爛」半公升脂肪，等於抽脂手術的四分一，更聲稱爆兩次可以減兩三吋腰。
FDA 未認可
不過，Ultra Shape 至今仍未得到美國安全機構——「食物及藥品管理局」（FDA ）的檢定認可，表示仍然危險，但美容界仍一窩蜂的吹捧，更掀起全球爆脂熱，市場上陸陸續續出現不同的爆脂機，而且愈出愈平，更由醫院殺入美容院，近年更席捲亞洲，由日本、台灣開始，再吹來香港大陸，字眼亦愈講愈激，「爆脂」、「炸脂」、「碎脂」等，已成為最新的減肥icon 。
「今年好多美容院都買咗，呢部機響歐洲專用來幫痴肥病人，但我哋改良咗，而家可以俾美容院用，DR （本港一間美容中心）都用緊呢部機！」專門代理纖體美容儀器的「柏麗代理有限公司」，近日亦向客戶力銷爆脂機「SuperMulti-Cell 」（超級強聲波爆脂儀）。
記者上到該代理公司，培訓導師Astley 隨即推介這個第四代「爆脂儀」，每部廿八萬，可安排上會︰「你響個客度搽啲啫喱、KY 之類，然後用超聲波機頭打圈，每次十五至廿分鐘，咁就可以打爆脂肪，而家我哋好多客出面幫人做一次收千幾蚊，如果你夠客，應該做一個夏天就可以翻本。」
她見記者猶豫，進一步游說︰「我哋會教你點用，唔使擔心，好快上手，一定識用。」Astley 說自己就是培訓導師，一般培訓課程大約兩三小時，感覺非常隨便。
大陸老翻機
爆脂機熱賣，不但香港有代理，記者在網站中搜尋，竟然發現就連大陸亦出現了售價只是六千八百元的老翻「爆脂機」，記者致電查詢，負責人說可以安排在香港收貨，「早排都有人訂去香港用。」
爆脂機周街有得賣，但質素完全無保證，陳衍里擔心情況失控，「出面好多唔同種類的爆脂機，但係超聲波有好多種，唔同頻率有唔同效果，你好難知道佢哋部機係點！」
他更質疑人體不斷爆脂，長遠會加重肝臟負荷、損害肝臟，「任何肥膏受損之後，一定係走去血管，然後入肝新陳代謝處理，如果你唔做運動，只會加重負荷。」根據目前法例，由於爆脂機並非侵入式儀器，所以不受法例監管，爆脂等於搵命搏。
一路抽，血一路流
相比爆脂，抽脂已經成行成市。整形外科醫生不諱言，抽脂是最有效的減肥方法，不過一樣危險。目前，在香港抽脂要六七萬，不少求美的女士惟有退而求其次，走到手術費起碼平一半的深圳抽，但完全搵命搏。
身高五呎、體重只得九十磅的May ，一直不滿意自己的手臂及小腿，認為太肥著衫唔靚，上月底亦加入深圳抽脂行列。「個價錢真係好吸引，香港抽手臂起碼二萬蚊，而家我只係五千蚊咋。」
「成個過程我都係清醒，但係唔痛，我知佢用支嘢撩下撩下，個感覺真係好難受。」最後，醫生只能從阿May 兩邊手臂抽出百多毫升的脂肪。「醫生都話抽得好少，只有半罐可樂咁多。」抽脂前，阿May 的手臂粗九吋，但抽脂後還未消腫，手臂只得八點四吋，她自言很滿意效果，相信消腫後，效果會更理想。「佢哋啲設備真係好簡陋，我留院嗰晚只係訓美容院床，張床仲有個洞。」最後她還是考慮再到深圳做小腿抽脂。
在互聯網的討論區，不時都會有網友記載自己在深圳的抽脂經歷，有個網友說得很恐怖，「抽完後感到小小麻痺同痛，仲有血水流出，所以姑娘就叫我吊止血同消炎藥水，一共要吊八支咁多……頭嗰幾個鐘，真係訓唔到，因為對腳紮到好實，之後就慢慢習慣，無咁辛苦，可以訓得到啦……」
仁安醫院外科顧問醫生梅力文表示，內地醫院的質素難以監管，他亦不時接收到因抽脂而傷口潰瘍的個案，警告北上抽脂的女士們三思。
爆脂期間，減肥人士躺在床上，醫生以超聲波機頭在肚腩上移動，打入超聲波爆脂。（相片由陳衍里提供）
記者以顧客身份走進多間纖體中心，纖體顧問不約而同力銷爆脂減肥。
經臨床研究後，陳衍里直言爆脂機名過其實。
踏入夏天，不少雜誌大賣爆脂廣告，力銷是今年最新的減肥儀器。
