【行色匆匆】
《全美一叮》Celine爸爸譚順生昨早拖着女兒回港，對所有是非一律拒作回應。
現年9歲的小巨肺譚芷昀（Celine）因參加《全美一叮》（America's Got Talent）而爆紅，但其父譚順生是非亦因而浪接浪，繼被薛家燕炮轟暗撬學生及被網民質疑他虛報資歷後，前日又有聲稱曾為譚順生打工的讀者爆他欠糧。是非纏身的譚順生昨日拖Celine由美國返港，對所有是非避而不談，只表示女兒準備了20多首歌參加《全美一叮》下一輪賽事。
香港小巨肺譚芷昀早前在《全美一叮》演唱Celine Dion主唱的電影《鐵達尼號》（Titanic）主題曲《My Heart Will Go On》爆紅，大前日更順利晉級比賽，連原唱者Celine Dion也在自己網頁轉發Celine片段讚她可愛。不過，Celine爆紅後，一手栽培女兒成才的譚順生亦隨即被人連環翻舊賬狂插，是非可謂一籮籮。昨日譚順生與Celine由美國洛杉磯返港時，刻意迴避傳媒，據悉他留待明天自己新唱片簽名會再作交代。
【扯住走人】
落機後一見記者，譚順生即表示要趕帶Celine返學。
【上車攰爆】
譚順生指Celine揀了20多首歌應付下一輪《全美一叮》比賽，Celine樣子看來攰爆。
「個女要趕返學」
自稱Dr.Steve的譚順生過去一星期是非不絕，其中最受注目的是被薛家燕公然力斥他當年自薦到「家燕媽媽藝術中心」任教，卻偷偷撬學生到自己的音樂教室學唱歌。譚順生昨日早上6時半拖囡囡Celine由洛杉磯返港，原本他該於機場A閘出閘，但未知是否為避傳媒追訪，而刻意兜大圈於另一邊的B閘離開。行色匆匆的譚順生見到記者時即大耍太極，對於種種提問包括有否致電向家燕姐道歉，及是否如聲明中承諾捐出約8萬元學費作善事等全不回應，他只謂：「個女要趕返學呀！唔講住喇！我個女好鍾意返學㗎！」原來Celine一落機便要趕返學，如此匆忙認真陰功。
Celine早前參加《全美一叮》唱《My Heart Will Go On》爆紅。資料圖片
譚順生與太太及細女現身《全美一叮》為Celine打氣。資料圖片
明辦簽名會回應
記者再問Celine稍後於《全美一叮》選唱甚麼歌曲時，譚順生即代女搶答說：「呢啲唔可以講㗎，簽咗保密協議。總之揀咗20幾隻歌啦！」譚順生跟女兒一起簽約蕭定一公司旗下，而近日譚順生更推出一張翻唱其他歌手歌曲的唱片《想到舊年》，明日下午1時假銅鑼灣舉行簽名會，有指屆時他才會一次過回應傳媒。對於譚順生連日爆是非，蕭定一昨回應說：「我諗佢嘅嘢我唔係好了解，等佢回應好啲，希望佢星期日出嚟嘅時候，可以一次過回應！」
張智霖與Celine妹妹同屬蕭定一公司，張太袁詠儀（靚靚）昨晚在中環四季酒店出席活動時，提到有留意Celine的新聞：「有留意，好矛盾，自己覺得小朋友應該以學業為重，知道佢同老公同公司，知佢通常都係禮拜六日出活動。好矛盾天賜有呢啲才能，唔好埋沒咗，但要學業為先。」對於家燕姐表示Celine爸爸要以身作則，靚靚表示：「唔知佢哋有乜瓜葛，自己諗小朋友出嚟表演，父母喺身邊最安全，要用呢個角度睇呢件事，最緊要喺小朋友身上做出發點，大人要話畀小朋友聽世界係點。」
採訪：梁繼光、羅慧敏
攝影：黃曉程、沈健程
袁詠儀認為不應埋沒小朋友的才能，但要以學業為重。
薛家燕日前炮轟譚順生暗撬學生。 資料圖片
From:
http://hk.apple.nextmedia ... 170624/20066684
