Celine上周在《全美一叮》亮相爆紅，連帶爸爸譚順生近日亦被翻出不少是非。資料圖片
小巨肺譚芷昀（Celine）近日因《全美一叮》（America's Got Talent）衝出國際，但Celine爸譚順生的是非就接踵而來，當中薛家燕日前炮轟他不道義暗撬學生，並收取貴五倍學費，家燕姐昨日出活動時透露已收到Celine爸以她名義捐出8萬元予保良局的收據，但對方仍未道歉。據知，Celine爸除想捧紅囡囡，亦想父憑女貴，由簽經理人蕭定一到公開活動，以綑綁式父女檔打孖上。
現年9歲小巨肺譚芷昀上周亮相美國節目《全美一叮》唱《My Heart Will Go On》而爆紅，連原唱者Celine Dion也在twitter轉載其片段，囡囡衝出國際兼晉級，但身為唱歌導師兼歌手、自稱「Dr.Steve」的Celine爸譚順生在香港被翻出不少舊賬，他前日拖Celine由美國返港全程避談是非。
有指Celine爸借囡囡Sell自己，以綑綁式父女檔簽約蕭定一公司。資料圖片
Celine爸在其音樂教室fb專頁以囡囡Celine作生招牌。
薛家燕日前踢爆Celine爸爸在她的音樂中心任教時暗撬學生，她昨日出席活動時則謂「唔鍾意提起任何嘢。」攝影：陳俊強
「我大人有大量」
日前薛家燕率先踢爆Celine爸早年破壞行規，在她的音樂學校任教時暗撬學生過檔，並收取高五倍的學費，Celine爸即發聲明「拆彈」，表示會以家燕姐名義捐出8萬元給保良局做善事。家燕姐昨日現身馬鞍山出席成人奶粉活動，在台上大跳十字步，問到Celine爸有否兌現捐款承諾，她表示：「噚日我個女收到message，就係用譚順生博士嘅錢、但係以薛家燕名義捐咗8萬蚊畀保良局嘅收據，我相信嗰啲錢都係我啲學生嘅學費，捐咗去都係好事。」問到對方有否向她道歉，她表示：「呢個就未有，不過唔使畀電話我，我都唔鍾意提起任何嘢。」
爆出暗撬學生事件後，Celine爸被網友發現他在官網疑虛報教唱歌資歷及唱歌比賽成績等，家燕姐表示未有留意報道，故不作回應。提到Celine爸聲稱教出《中國好聲音》第二季香港賽區冠軍張翊龍，事後被對方踢爆只是去試堂，她表示：「其實我同佢真係好少接觸，件事都告一段落，我淨係知佢上堂時會派卡片。不過Celine真係唱得好好，希望佢都唔好忘記學業，努力讀書。」問會否覺得Celine被當成搖錢樹，家燕姐即皺眉，再補充指要完成學業為先。再問對方欠她一句道歉，她表示：「唔使喇，我哋大人有大量。」
綑綁式簽蕭定一
據知，Celine爸除栽培Celine的歌唱事業，他本人亦非常渴望父憑女貴，故由簽蕭定一經理人合約到公開活動，以綑綁式父女檔打孖上，實行硬sell自己。本報昨聯絡蕭定一，問Celine父女合約是否綑綁簽，他回覆：「唔好咁講，係簽咗兩父女。」兩父女合約條件是否一樣？他表示：「唔一樣，佢爸爸想喺呢行發展，如果有啱兩父女，咪合作一齊做。」
另外，Celine爸日前被指在fb指自己於08年在菲律賓馬尼拉一大學擁有博士銜頭，但本報昨日發現他已刪走fb戶口，他的個人官網亦已關閉。今日Celine爸會現身銅鑼灣出席新碟簽名會，不過其經理人公司已表明不設傳媒訪問，本報昨日曾聯絡Celine爸，惟他於截稿前未有回覆。
採訪：盧妹、鍾國仁
from:
http://hk.apple.nextmedia ... 170625/20067628
