熊黛林穿上鮮紅色長裙出席汽車品牌活動，流露幸福笑容。
現年36歲的熊黛林（Lynn）與郭可盈胞弟、家族坐擁百億資產的郭可頌拍拖一年多，前日終於在微博報喜：「我們結婚了！」榮升「百億人妻」的Lynn昨日婚後首度露面，在銅鑼灣出席汽車品牌活動，吸引半百傳媒採訪。
提城城「過去啦」
人逢喜事的Lynn，一身紅噹噹穿上Victoria Beckham的貼身紅裙及4吋高踭鞋，左手無名指戴上鑽石戒指。她在台上賣口乖表示好喜歡該汽車，但由於不熟路，由老公揸車可以去更多地方，大晒甜蜜！之後Lynn接受訪問，被叫郭太，她一臉甜絲絲謂：「唔係好慣，未有人咁叫我。」她直言婚戒款式好簡單，但是由兩人一齊挑選。
Lynn透露婚期原定在9月舉行，但因為要拍戲一再延遲，直至前日老公突然說：「不如聽日去結婚！」便促成好事。被笑老公好心急，Lynn說：「都急咗一輪啦，睇番又係吉日，再等又唔知等到幾時。」有指註冊日期剛好在舊愛郭富城生日後一天，是否示威？她說：「如果唔係嗰日我出街，佢哋（記者）同我講都唔記得，過咗咁耐就由佢過去啦。如果咁諗就諗太多，諗呢啲又延期又要重新申請，可能唔知等幾耐，我哋自己開心就得嘞。」
榮升郭太的熊黛林，婚後首度現身，獲大批傳媒追訪。
熊黛林婚後翌日即出活動，她揚言老公最支持她工作。
郭可頌與熊黛林前日穿上簡約服裝，在港簽紙註冊結婚。資料圖片
為老公收起性感
由於決定註冊時間太趕，雙方父母都未有在場，只由經理人Kim做證婚人，稍後亦只會一家人食飯，不會再大搞。問到是否雙喜臨門，等百日宴才大搞？Lynn笑說：「未有住，但希望有咁好嘅幸運啦。」她直言婚後不設防，問到會否減少工作？Lynn說：「佢最支持我工作，只係將來有BB，為身體先減少啦。」
至於Lynn昨日明顯收起性感，她直言每個男人都不喜歡，但不會問老公拍親熱戲的底線，因為怕尷尬。有指Lynn榮升「百億人妻」，她說：「大家寫得太誇張嘞。」送千萬樓做聘禮？她說：「總之有大家名，物質唔係咁緊要，最重要佢會計劃大家將來。」
採訪：盧妹
攝影：沈健程
from:
http://hk.apple.nextmedia ... 161029/19815557
