小鳳姐拎起把做咗手腳嘅軟尺幫家燕姐度腰。
徐小鳳一連8場演唱會前晚喺紅館圓滿結束，小鳳姐連環發放笑彈。演唱會中途有男粉絲對住小鳳姐大叫「我愛你」，小鳳姐話：「咁肉麻，呢啲私下講，唔好大庭廣眾講，如果係咁，你騷畀我睇，show me your love，呢個係中文，即係粟米肉粒。」
（左起）薛家燕、小鳳姐同黃淑儀識咗好耐。
有粉絲着波點裝到場，襯番小鳳姐。
出術度22吋腰
尾場嘉賓係杜德偉，仲有黃淑儀同薛家燕，幾個阿姐話大家識咗好耐，講起小鳳姐條22吋纖腰，佢話：「當時話我22吋，其實可能係18吋，未發育，𠵱家先至係叫做正式發育。」小鳳姐即場幫家燕姐度腰，仲以為佢笑家燕有水桶腰，原來係一齊搞笑，因為軟尺做咗手腳，成把尺都寫住22吋。小鳳姐又寸家燕姐件衫，話佢件粉紅底藍色花紋衫：「遠睇以為你着胸圍。」家燕姐笑笑口話：「咁着睇瘦啲。」
講起胸圍，小鳳姐即場分享一件陳年舊事：「好耐之前有個朋友同我講，話行女人街，內衣檔口個哥哥叫人買胸圍，佢大叫話『嚟買啦！徐小鳳都着過。』嗰時知道嬲到我死，成日想落去鬧鬼佢，嗰次之後唔敢落去女人街嗰度。」
撰文：馮仁昭
from:
http://hk.apple.nextmedia ... 160808/19726879
