香港人出名生活緊張，早午晚三餐唔定時，八珍以為呢啲只係一般打工仔要面對，殊不知，大把身家嘅徐小鳳亦一樣。
細佬喺中環買完外賣上車，小鳳姐將車駛到上環，然後停低開餐。
見八珍落車影相，小鳳姐第一時間開車走，同車胞弟則一手揸住咖喱牛腩飯，一手擋鏡頭。
上週末Superband 開show ，甚少公開露面嘅小鳳姐亦有去紅館捧場。
早兩個禮拜六（三月廿一日）下午接近兩點，八珍揸住錢八路經中環皇后大道中，喺中環廣場對面見到小鳳姐揸住架車停低一邊，等佢細佬買外賣。之後，兩姊弟去咗上環文咸西街，以為小鳳姐要買海味，點知佢哋停埋一邊，坐喺車廂捧住盒飯開餐。
咁奇景，八珍即刻落車硬啪，小鳳姐手快，放低手上盒飯扭軚就走。咁富貴，食個晏都趕頭趕命，八珍食瞓皆安樂，難怪冇錢！明晒！
