《鳳閣恩仇未了情》是家傳戶曉的粵曲，時至今日仍是K場金曲之一，原唱者之一的鳳凰女，原來是資深電視人徐小明（小明哥）契媽，當年女姐向他親授曲藝及引領他進入電視圈，為紀念恩師栽培，小明哥會在演唱會演唱契媽名曲作致敬，又向本報率先分享女姐封藏多年的珍貴戲服。
徐小明為紀念恩師鳳凰女的栽培，會在演唱會演唱契媽名曲作致敬。
出生自「粵劇世家」的小明哥，主力在影視圈發展，今次與愛徒高麗不約而同向恩師致敬，小明哥笑說：「我諗係女姐指示我哋，我同高麗完全冇夾過，係不謀而合紀念女姐。」
他又坦言因向影視圈發展，辜負了家人與恩師：「今次個唱為紀念媽媽、女姐對我一番期望，特別選一節唱粵劇《鳳閣恩仇未了情》同《紫釵記》。（緊張？）冇，自細練唔會生疏，因為有父母教導，加上女姐嚴格要求，好似踩單車咁唔會唔記得。（將來開粵劇騷？）隨緣啦，始終我唔係主力發展粵劇，要睇有冇時間排練、記曲。」今次的製作費高達七位數以上，單是幕前也有一百三十人，包括中西樂團、粵劇樂隊、合唱團、武術隊及舞蹈員，幕後團隊則逾百人。
小明哥翻閱珍貴照片。
鳳凰女珍藏的「推車裝」，贈予愛徒高麗。
鳳凰女
師傅替他沖涼
小明哥童年被女姐一手發掘，回想入住師傅家首天，她便親手替他沖涼，他大讚身為大明星的女姐毫無架子、溫柔兼愛錫後輩：「佢對徒弟要求好嚴厲，每次檢查都不期然打震，我做得好佢就會好開心，性格好大情大性，唔會求咩回報。」
對於師傅珍貴戲服將舉行展覽，小明哥說：「女姐對高麗情義深厚，私伙嘢成箱畀晒佢，高麗都保存得好好。依家啲戲服好珍貴，因為釘珠片技術已經漸漸失傳。」又說最深刻是首次見女姐在《六國大封相》中所穿的「大漢裝」與「推車裝」，為凸顯當家花旦的氣派，特地在「推車旗」繡上其名「鳳凰女」，戲服上綿密的珠片，均由師傅一針一線人手縫製，手工精緻。
女姐紀念活動
粵劇名伶鳳凰女逝世近22年，留下多部經典作品，契仔徐小明與愛徒高麗，不約而同選在8月進行紀念活動，小明將於15至17日假演藝學院舉行《徐小明感恩豪情演唱會2014》，高麗則在30日及9月2日分別上演女姐的經典之作《鳳閣恩仇未了情》和《百戰榮歸迎彩鳳》，並於16日起在高山劇場設置展覽，免費展出女姐生前的舞台服飾。
文：影視組
攝影：張福宏
場地：逸東酒店
From:
http://orientaldaily.on.c ... /00282_054.html
