MK組合FAITH去年10月先至退咗個成員Wave，佢仲係自己「被退出」之後至知自己已被out嘅！罪名係佢私務繁多，無法兼顧FAITH的工作，令唱片計劃延誤，故才加入楊柏麟(River)及鄧鈞耀(Dawn)代替。最爆嘅仲係，Wave本人根本唔知被暫停工作，要fans話佢知「你out咗喇」，佢至知。到昨日，又有成員被out喇！
根據其所屬唱片公司宣佈，罪名包括：
1.多次綵排及表演失場
2.未經公司與客戶接洽及授權批准的情況下，瞞騙公司多次私自應邀接洽攝影及出席活動等工作；
3.另外，由於FAITH歌迷年齡層非常年輕，但在公司多次勸喻之下，仍然堅持在其社交網站上張貼各種半裸照片，除了影響公司及團隊形象之外，甚至多次引來「有心人士」向本公司查詢鄧之「不正經交易價格」，令本公司不勝其煩！
唱片公司聲稱，「鄧(Dawn)此舉實在讓FAITH的理念與清新健康形象大受傷害，多個廣告及形象大使工作亦被煞停，亦令公司團隊以致其他成員蒙受嚴重的損失！」又表明公司會就之前Dawn私下接過嘅job同私影保留法律追究權利，包括向Dawn本人，以及各大「『明知故犯』的涉事客戶」。
除咗Dawn被出局，另有成員可能被「停牌」。邊個？唱片公司唔講，只係喺聲明尾段寫道：「在經過公司內部評估之後，FAITH其餘成員亦曾犯下個別過失，但嚴重程度不一，因此除了鄧之外，本公司亦已經向有關之成員作出了「雪藏」(即暫停一切活動及工作)的警告，而表現良好的成員仍會繼續活躍。」
即係點？？？？
其實22歲嘅Dawn，去年5月加入之初(3+2=4)，已經俾網民起底貼佢嘅全裸照，張相更喺同志網瘋傳，社交網站自貼大量僅穿小三角泳褲曬肌嘅相。網民又爆佢之前叫做Edmond，2012年曾選《FACE》UStar校花校草選舉，大前年由港大食物及營養學，轉校到理大職業治療，表演慾極強，中學時期年年參加「全港中學校際歌唱大賽」，就連聯校歌唱比賽，同nowTV主辦嘅「快樂男聲」都唔放過。
因為貼半裸照，俾人問價同影「私影」，破壞Dawn同唱片公司嘅合約精神？而FAITH又係「歌迷年齡層非常年輕」，就係因為咁，而成為出局理由之一？
咁Dawn點回應？佢喺fb冇回應，只係最擔心公公健康。亦有人話:「恭喜最睇得最唱得嘅Dawn脫離Faith！一個鍾意唱歌，又有啲技巧嘅人，留喺入面真係浪費咗！」
from:
http://hk.apple.nextmedia ... 160605/19642057
