有「香港賽車之父」之稱的潘炳烈前日生日，老婆黃夏蕙為他在九龍灣一酒家筵開80席賀80大壽，並以女主人身份滿場飛。一班好友劉錫賢、祥嫂洪金梅、譚炳文及苟芸慧等都有到賀，但出席人數超出預算，令不少友人沒有位坐，事後夏蕙姨在facebook貼出肉背半裸照向各人道歉。
潘炳烈80大壽晚宴高朋滿座，更出現爆枱冇位坐情況。
苟姑娘都有出席為潘炳烈賀壽，還趁機集郵。
潘炳烈80大壽晚宴，夏蕙姨盛裝以女主人身份四圍走。
好友太多坐凸酒席
潘炳烈跟夏蕙姨在台上合照後，壽星公細心扶夏蕙姨落台，但就婉拒訪問。夏蕙姨解釋因為潘生已經太累，她又講到生日禮物：「本來想唔送，但係禮貌上都要送，送咗隻金同鑽石嘅勞力士畀對方，早已送咗個心畀佢，送錶係因為『襟撈』，價值幾十萬，不過佢唔係好鍾意。」她透露最開心是小朋友在外國返來跟潘生賀壽。
昨日凌晨夏蕙姨再在facebook貼出兩張扮泰國武打影星Tony Jaa在電影《拳霸》的造型相，曬肉背道歉：「其實我都唔知道自己咁有號召力，爆咗82圍出嚟，搞到好多朋友冇位坐，尤其係我契女殷師傅，明明寫咗佢個名，都畀人搶咗全枱。」
夏蕙姨表示連原本預給記者及fans的8圍酒席，亦不知何故被人坐滿，但最令夏蕙姨最不開心是激怒前經理人，夏蕙姨於留言續道：「最大件事係激到我之前隻肥豬經理人，安置完班記者之後，頭也不回咁走咗，今次死啦！今日我再次多謝大家畀面同捧場，不過今晚安排，真係好唔好意思，原本磨拳擦掌，喜氣洋洋咁慶祝，點知搞到咁混亂，唉！短期內我都冇面目見人啦！醒張相同大家道歉啦！」
採訪：卓寶花
攝影：陳慧安
from:
http://hk.apple.nextmedia ... 160107/19441237
