自嘲人渣嘅周永恆（Roy）新聞不絕，之前上ViuTV《晚吹》錄錄嚇影走咗出去，有雜誌爆佢對34D嘅𡃁模女友黃芊詠（Cherie）郁手。最新係噚日有週刊登咗一張疑似Roy同Cherie嘅WhatsApp截圖，女方懷疑男方有不良嗜好，男嘅就數女友出賣自己色相。不過現實幾時都比電影離奇，噚日佢哋兩個又冇事咁蹺曬手喺旺角亮相，出席一間娛樂公司成立嘅記招，順便宣傳埋新片《男神最痛》同《尋找女神》真人騷。
黃榕將會有份參加《尋找女神》真人騷選拔。
否認手機截圖
Roy就係呢間公司嘅業務總經理，佢接受訪問時否認截圖係嚟自兩人嘅手機，Roy話：「近排我媽咪都收到好多唔同女士，用女朋友頭像嘅fb賬號add佢，大約有4、5個左右，所以近排有好多Cherie出現。週刊嘅嘢我係控制唔到，希望大家集中番喺電影公司同工作上嘅嘢。」
講到毒品問題，Roy話已經係陳年舊事，𠵱家有八嚿腹肌，所以唔需要。同女友感情佢話事實擺在眼前，女朋友亦冇因此而唔開心，Roy又攬住女友話：「面對壓力，佢比我更加強，有時係佢安慰我。」至於會唔會開戲捧女友？佢話：「要問番老闆，我只係總經理！有機會會安排嚇佢做戲。」但就承認女友有面試做真人騷，同場面試嘅仲會有黃榕。
撰文：馮仁昭
馮仁昭
from:
http://hk.apple.nextmedia ... 160527/19628942
