自嘲人渣的周永恆（Roy）拒簽紙跟老婆趙頌茹（阿Yu）離婚，聲稱自己的宗教信仰相信婚姻是一生一世，希望事件有冷靜階段。怎知言猶在耳，讀者陳先生昨透過本報爆相爆片，踢爆Roy又有爆乳新歡上場，乃女子組合o.m.G成員黃詠珊（Cherie），面尖波大的Cherie有不同中文名，曾用黃芊詠組成Triple Secrets。
從相片所見，Roy攬實Cherie如黐頭芒合照，又煙韌又親密，另一張Roy左擁Cherie右抱另一女子，Cherie留言：「Thank you Roy哥哥幫我哋錄歌。」陳先生在電話說：「Cherie之前學打碟，搞咗隊o.m.G組合，成日話今年會出道，仲喺尖沙嘴嘅酒吧出騷跳舞，聽講周永恆做咗佢經理人，佢𠵱家仲同周永恆一齊住，Cherie喺fb貼咗見唔到周永恆樣嘅相，話呢個男人永遠喺佢背後。」
Cherie擁有V煞面和巨咪身材，難怪吸引到Roy。互聯網圖片
周永恆的疑似新歡Cherie（左），曾以組合Triple Secrets進軍樂壇。互聯網圖片
新歡以前面圓圓
陳先生還指Cherie好鍾意出名：「佢喺fb tag名話喺劉馬車屋企打邊爐，又同錢國偉影相。」他更指V煞面的Cherie以前面圓圓，又謂網上有很多她的錢銀糾紛。本報致電Cherie求證，但電話沒人接聽。最近跟Roy合作歌曲的rapper曲赤，被問到知否兩人拍拖？他在電話說：「又拍拖？係咪拍MV咋，我唔係好知佢哋係咪拍拖喎，因為我同佢傾緊合作出歌，唔知阿Roy係咪都諗住同佢整歌拍MV。」對於Cherie疑變面，曲赤說：「係咪整容apps呀？𠵱家好興個個女仔都用啦。」
阿Yu拒回應阿Roy疑有新歡，專心湊好兩個囡囡。
而阿Yu對於Roy不肯簽紙離婚，卻又疑另結新歡，她的經理人回覆：「阿Yu不會對周先生的私生活作任何回應。」阿Yu昨到商台接受訪問，對於有家長趁極凍天氣帶小孩到大帽山，阿Yu說：「人哋做父母嘅唔評論，其實要知冰點形成，打開雪櫃就得，感受嚇係可以，但要大啲，佢自己可以負責任，𠵱家由我負責，所以要確保佢哋安全。」
採訪、攝影：皓騫、張俊銘
from:
http://hk.apple.nextmedia.com/entertainment/art/20160126/19466516
