曾自認係「人渣」嘅歌手周永恆，早前有第三者Ruby，令老婆趙頌茹(Yu)心死，提出離婚。周永恆早前上咗ViuTV綜藝節目《晚吹》，當中一個主題《總有一隻喺左近》係由陳淑蘭做主持，以talk騷形式，訪問「賤男」嘉賓，日前先播出嘅預告片，周永恆已經火滾爆粗鬧：「X！昆X我上嚟！僕X嚟㗎！你攞住本雜誌睇到我嘅嘢嚟害我。」
前晚節目正式出街，內容更重火藥味。周永恆話自己嘅感情嘢，外人冇資格討論，陳淑蘭即笑對方戇居：「如果你覺得係家事嘅話，我都有好多不可告人嘅家事，又唔見我喺雜誌接受訪問時講呢啲。」周永恆反問：「你講邊本雜誌，我講過呢？」
陳淑蘭就話：「總之有雜誌，你喺接受人訪問嘅時候，唔止係一期、兩期嘅事，一係就唔係賤格，係笨Seven，係唔係先？中咗一次，仲要中幾次。」周永恆續言嗰段時間，佢自己都唔知自己想點，跟手又係咁講英文單字，又形容唔到係咩，周永恆講：「我剛才講好shuffle。」陳淑蘭問佢英文係唔係shuffle，周永恆又講：「係『shiffle'嗎?」陳淑蘭寸爆話只係知咩係「truffle」，叫佢唔好講英文，唔知佢講緊咩，周永恆尷尬講：「我讀到中四㗎咋!」見周永恆不斷亂「拋書包」講啲佢自己都唔明嘅生字，陳淑蘭即扯曬火：「本來我今日係想用賢淑嘅態度，你咁樣講兩講，令到我真係……」周永恆死撐：「咁咪睇得開心囉！繼續啦！」陳淑蘭又插爆周永恆有啲嘢「夾硬」嚟：「唔抵得你咁笨，你明唔明？覺得我哋屈你上嚟，你明唔明？平反啦！老實講，我真係覺得你係賤男，我買咗嗰幾本雜誌，我真係覺得你係賤男，所以你要平反，我初初對你印象幾好。」
到最後素人嘉賓上嚟分享自己見過嘅賤人係點，蘭子就問：「賤唔賤得過呢個。」素人答：「齋睇雜誌上講嘅嘢，就冇呢個咁賤。」雖然蘭子補鑊話唔係講周永恆，但周永恆已經起身離開座位，企圖衝出門口，被工作人員勸止。之後周永恆仲轉身鬧爆：「你仲拍X嘢。」經過工作人員勸止，周永恆重新返回座位做Ending：「主持人應該要中立，我發覺家陣畀兩個女人夾攻，我完全唔覺得你係一個中立嘅角度。」而蘭子都話：「周永恆係大家心目中有既定形象，有時可能係對號入座。」
from:
http://hk.apple.nextmedia ... 160419/19577463
