大台演反派，演到人見人愛嘅李佳芯(Ali)，就連素顏睇落都咁正，唔講真係唔知佢成33歲，早前一班高登仔拎曬《潮流教主》女藝人嘅半素顏相出嚟，當中以人妻李亞男同Ali最索，有樣有身材嘅Ali，由有線過無線，又係「餘黨」，自然成為被大台力捧上一線。
昨日有週刊爆，佢同nowTV主持陳炳銓(Danny)拍拖，宅男女神Ali已被私有，雖然男方相貌普通，不過勝過為人幽默，把口又啷過油，未知係唔係Ali對男友暫時冇咩安全感，所以暫時冇帶男友見家長。
Ali早前拍《名門暗戰》、《潮流教主》做反派，演技似乎好過曬一班「港姐黨」蔡思貝及陳凱琳等，跟手仲升呢做女一，擔正大台劇《律政強人》及《與諜同謀》，劇接劇都真係幾忙，但Ali都有抽時間拍拖，日前先被影到佢同男友Danny去赤柱拍拖，仲情不自禁當街錫錫。
據知，Ali同nowTV主持Danny係一齊行山認識而擦出愛火，Danny係喺加拿大讀舞台製作，所以Danny喺Ali演技上教識佢好多嘢，佢哋又一齊跟過秋生學做戲，盛傳佢哋拍拖一年，Ali都未帶男友去見家長，有指係因為Danny為人熱情，不時有女伴埋身，令Ali未有安全感，唔知係唔係想睇定先呢！？
from:
http://hk.apple.nextmedia ... 160323/19540929
