林芊妤（Coffee）前晚大年初三到朋友家拜年後，獨個兒搭的士返將軍澳屋企，怎知她所乘的士跟私家車相撞，幸好Coffee大步檻過吉人天相，嚇壞了的她事後在facebook貼相併留言：「我搭的士突然之間撞車，突然成個人撞前，我以為自己會死，thanks God！」
車門被撞開
昨日Coffee接受本報電話訪問，坦言當時自己沒扣安全帶：「我𠵱家冇事，係少少擦傷，噚日去咗朋友屋企拜年，好攰，返屋企喺的士瞓著咗，突然砰一聲，我個人就衝前，兩個膝頭哥跪咗喺地下，應該係兩架車撞埋一齊，我唔知邊架撞邊架，的士哥哥同我講話係嗰架車突然之間煞停。」
當時正睡著的Coffee，不知道事發經過，醒來時只見到車門都被撞開了，滿地都是玻璃碎：「砰一聲就衝前，嗰刻個腦閃一閃，感覺好奇怪，道門已經開咗，因為喺我坐嘅左手邊撞埋去，所以我嗰邊成道門開咗，見到啲玻璃碎喺地下，自己都嚇親，撞親少少個頭同兩個膝頭哥，𠵱家冇乜大礙，我都冇去驗傷，只係坐喺架的士度落口供，希望當新年擋咗個劫，嚟緊呢年會平平安安啦。」
網友獻慇勤
前晚Coffee將交通意外事件貼fb後，網友紛紛留言祝福平安，甚至有男網友乘機獻慇勤，提出要陪她去醫院檢查，當大家知道Coffee沒大礙後，有網友更搞笑留言：「你太靚……影響咗司機駕駛技術」、「司機掛住睇後鏡唔睇前面條路，唔撞至奇。」
採訪：小米
撞車後，Coffee在的士上落口供，但沒去醫院驗傷。互聯網圖片
Coffee前晚在fb自爆撞車：「我以為自己會死」，新年流流大吉利是。
Coffee事發前曾在fb貼在親友家拜年的相。
from:
http://hk.apple.nextmedia.com/entertainment/art/20160212/19487560
