吳綺莉（Elaine）去年因涉嫌打女而差點惹上官非，幸好現時已和愛女卓林冰釋前嫌。新一年新氣象，和囡囡大和解的吳綺莉，坦言猴年最想找個伴，更有心理準備迎接第二春，對此卓林亦大表贊成，她說：「囡囡好開通，之前佢話自己幾年後要入大學，叫我快啲搵個伴，不過對方一定要錫我！」
玲玲師傅（右）批Elaine猴年會遇到真命天子，令Elaine笑不攏嘴。
玲玲師傅（左）自掏荷包送了一盆蘭花給Elaine。
貴人增旺多人錫
前日適逢立春正式踏入猴年，坐言起行的吳綺莉即相約老友麥玲玲師傅到維園揀靚桃花，希望增強自己的姻緣運，她表示：「我之前唔敢買桃花，因為好驚會揀到爛桃花，到頭嚟桃花運就冇，變咗桃花劫就弊啦！」此時，麥玲玲即席為吳綺莉批命說：「你生肖屬鼠，注定條命會遇到好多爛桃花，有好多短暫而唔穩定啲霧水緣，不過唔緊要，你今年運勢會有明顯好轉，貴人增旺又多人錫，今年好大機會會同一個外國人拍拖，如果遇到真姻緣，仲會即刻有喜㖭！」
Elaine特別買了一盆有助學業運的富貴竹給囡囡卓林（小圖）。
聽到猴年會有真命天子出現，吳綺莉即拖實玲玲師傅在花檔揀花，玲玲師傅說：「其實今年桃花位係喺東南位，除咗可以擺桃花，蘭花都可以催旺姻緣，我建議Elaine如果真係買花，記住要揀啲鮮艷顏色嚟擺，但切忌擺廳中間或者東北位，因為呢兩個位係病位嚟，唔單止會減弱姻緣，仲會催旺病星，對自身健康會有影響。」
最後麥玲玲即場掏荷包買了一盆紫紅色的蘭花送給吳綺莉，令她開心不已。麥玲玲說：「通常師傅送嘅花會特別靈，因為會沾到啲財福同旺氣，希望你今年搵到一個好男人開花結果！」除了買花，當吳綺莉得悉富貴竹可以有助學業運時，亦不忘買了一盆迷你富貴竹給囡囡。
採訪：王梓嫚
攝影：陳志嵐
from:
http://hk.apple.nextmedia ... 160206/19481659
