吳綺莉（右）在新一輯《獅子山下》演單親媽媽，與劇中女兒黃美棋相依為命。攝影：沈健程
戲如人生，旁人說出來輕描淡寫，由吳綺莉說出來卻如千斤重。命運往往殘酷，最近吳綺莉拍攝新一輯《獅子山下》，巧合地要飾演患上躁鬱症的單親媽媽，再觸碰破碎的傷口。在她而言，觸景傷情並不可怕，而是人言可畏，吳綺莉承認當年為成龍產女是自己過錯：「嗰件事唔係佢（卓林）錯，係大人，冇理由要小朋友承擔。」
撰文：嵐山
吳綺莉（Elaine）在今年3月被女兒吳卓林爆出酗酒及涉嫌打女，情緒受困下，仍堅持接演港台劇《獅子山下》單元故事《兩個月亮》，與黃美棋飾演兩母女。劇中Elaine要演一名患有躁鬱症的單親媽媽，為一間天台屋差點走上絕路。
在獅子山下每個人都有自己故事，Elaine在99年為成龍未婚產女，因為壓力太大亦曾有過自殺念頭，之後帶埋囡囡卓林避走到上海定居，至11年才返港重投娛樂圈。日前Elaine與美棋在九龍塘一棟大廈天台接受本報訪問，被問到可擔心難以抽離角色？她說：「我OK，我係做戲還做戲，完咗就會跳番出嚟。」
吳綺莉誕女承受極大壓力曾想過自殺，恰巧《獅》劇中有類似鏡頭。劇照
年初吳綺莉涉虐打女兒卓林，不過她仍努力開工養家。資料圖片
美棋演孝順女，保護媽媽吳綺莉。劇照
恨有如意郎君
重提當年事，Elaine說來沉重：「我入行25年，今時今日仲學習緊『人言可畏』四個字，有時人哋講嘢唔啱聽，我都仲會有兩粒鐘唔係咁高興，何況一個小朋友？我唔希望佢成長過程有童年陰影，嗰件事唔係佢錯，係大人，冇理由要小朋友去承擔。最後決定搬去上海住，都係希望將殺傷力減到最低，𠵱家大個咗返嚟，全世界都知我有個女啦，冇先奇怪。」
Elaine都是在單親家庭中長大，她承認一直對女兒管教好嚴，經常會給予好多壓力，年初卓林稱為救母報警，令Elaine反思過去，現在已學懂放輕，望與女兒重修關係。她說：「我以前好有要求，希望佢喺我嘅經歷上面睇到一啲嘢，要問自己承唔承擔到後果先？講得多可能就畀咗好大壓力佢。但𠵱家最緊要係佢開心，同唔好浪費生命。」
卓林如今已經15歲，亦不介意媽咪尋找另一半，現在可有追求者？Elaine瞪眼認真要求謂：「快啲，《蘋果》幫我登半版廣告，我都好恨搵番個！個女不知幾接受，兩、三年前有帶一班朋友返屋企食飯，佢會同我分析呢個唔好、嗰個得，好好笑。」
服裝：Club Monaco（吳綺莉）
Salad、Oriental Traffic（黃美棋）
美棋渴望戀愛
黃美棋在劇中飾演𡃁模Maya，她直言第一日與吳綺莉合作有點驚驚哋，她說：「記得第一場戲就講Elaine喺天台自殺，我要保護媽媽離開現場，但佢咁高，我又咁細粒，我跳起都遮唔到佢塊面，諗起都好搞笑。」
美棋在戲裏戲外都是一名孝順女，不過她為爭取自己理想，曾與父母意見分歧，她說：「讀書畢業後，我做咗marketing一年，媽咪會覺得正正常常返朝九晚五好好哋，怕我辛苦，所以好反對我再入娛樂圈。後來我再解釋，我真係想試，媽咪先慢慢接受。」美棋BB好受宅男歡迎，但未知是否怕嚇走粉絲，所以一直不公開與有線主持鍾建威的戀人關係？美棋說：「適當時候會公開，我同Elaine一樣，都希望擁有一段細水長流愛情，要結婚先叫穩定交往。」
from:
http://hk.apple.nextmedia ... 151124/19384852
