經歷過兩段婚姻失敗嘅前歌手小雪（蔡雪敏），舊年同細佢4年嘅韓國男友Robin Cheung喺澳洲註冊結婚，婚後繼續喺澳洲生活，最近小雪同老公帶埋仔女返咗嚟香港，噚日馮仁昭喺尖沙嘴新港中心見到呢對新婚夫婦。
做咗人哋阿媽嘅小雪，真係得天獨厚，雖然佢下個月已經37歲，但係個樣同身形都keep得好好，見到佢兩公婆十指緊扣睇完衫又去睇女性用品，難得佢老公一啲都冇尷尬。
事後小雪同馮仁昭講，今次佢哋返嚟香港嘅時間唔多，不過都有搵舊老闆羅傑承同埋啲舊同事敍嚇舊，佢話：「羅生佢真係好好，我哋一直都有喺fb有聯絡，佢都有問候嚇𠵱家嘅生活，所以今次返嚟專登約佢同啲同事見面。」
小雪去咗一間賣女性內衣店睇嘢，難得佢老公一啲都冇尷尬。
或返港唱歌
至於有冇機會再合作，小雪話：「睇嚇大家啲時間，坦白講，𠵱家生活冇以前咁忙，我啲仔女都大個咗，如果真係有個機會去唱歌，可能我會再安排啲時間返香港工作。」
撰文：馮仁昭
攝影：徐錦池、潘冠恩
馮仁昭
from:
http://hk.apple.nextmedia ... 160121/19459875
