今年賀歲檔猛片一大籮，有《功夫熊貓3》、周星馳嘅《美人魚》、周潤發嘅《賭城風雲3》同郭富城嘅《西遊記之孫悟空三打白骨精》，甄子丹部《臥虎藏龍2》同黎明自導自演嘅《Z計劃》原本都排呢個檔，但呢兩套戲免得冇肉食，都閃走咗啦。
城城回覆本報話：「我十分喜歡這張IMAX3D萬個悟空一飛衝天海報，很有動感和力量。」
獨家有IMAX
城城主演嘅《西遊記》噚日喺上海開記者會，城城帶住馮紹峰、小瀋陽同羅仲謙出現，各人仲拎住唔同法器上台。城城近期喺上海拍緊《永不消逝的電波》，噚日特登請假做宣傳，問佢今年賀歲檔對手咁多，有冇信心成為票房王者？佢話：「我今次做孫悟空係傾盡心力去演出，舞功混合武功，全力以赴，希望大家睇到一個不一樣嘅孫悟空！」電影公司亦宣佈喺賀歲檔3部華語片只得佢哋有IMAX3D，對部戲嘅視覺特效作出肯定。
人逢喜事嘅城城不停同內地新歡方媛（Moka）放閃，繼日前兩人喺內地睇戲被直擊後，原來Moka喺上月聖誕前又來港，被傳媒影到佢孖朋友去名店掃貨過新年。
撰文：馮仁昭
馮仁昭
from:
http://hk.apple.nextmedia ... 160107/19441287
