天文台昨日錄得130年來36.3度最高氣溫，正當大家選擇在室內嘆冷氣之際，近日全力搞網購的香港電視網絡主席王維基，卻選擇與同事落區送貨，向市民免費派蜜瓜，之前與他相約看電影的女助理亦全程傍實。穿上制服的維基跪地執貨送貨一腳踢，雖然大汗淋漓，但全程笑笑口十分享受，他受訪時笑說：「想體驗嚇自己同事運送過程，辛唔辛苦。」
港視主席王維基近日瞓身力谷HKTV mall網購生意，日前有網民在facebook留言鬧爆在港視購物送咖啡機竟變成送蜜瓜，維基即親自留言拆彈跟進，成功化「危」為「like」。昨日天文台錄得130年來36.3度最高氣溫的大熱天，維基更化身送貨員，向市民豪送逾價值5位數美食，包括日本溫室蜜瓜、梅酒及蘋果汁等。
【分貨】
王維基與同事在貨車分好貨後，各自派送上樓。
【融入】
維基與女助理Hazel，一同穿上制服分貨送貨。
【跪地】
維基跪地執貨，投入程度超乎想像。
街坊大讚好感動
為宣傳網購生意，維基在昨日和今日一連兩日進行「WhatsApp大送禮」，向太古及康怡花園街坊送禮，居民透過WhatsApp揀選禮物，維基便與團隊親自派送禮物上樓，但因反應太熱烈，港視宣佈今日派禮活動取消。記者昨午3時許，在康怡花園見到一輛掛上宣傳banner的大貨車，車上放滿蜜瓜等貨品，除維基及兩名網購職員外，之前與維基一起去睇戲的私人女助理鄭蔚藍（Hazel）亦全程傍實他，與維基齊齊穿上粉紅及灰色的制服。
維基捧住一箱蜜瓜㩒大廈門鐘送貨，其間有街坊拉住他集郵合照，也有男街坊對維基充當送貨員表示：「好感動。」昨日天氣酷熱，送完一單又一單的維基也忍不住上車唞一唞和飲水解渴，然後又執貨送下一張單，甚至放下老闆身段跪地執貨，投入程度完全超乎想像。
維基受訪時笑指自己暫時送了8個柯打，直指今次送禮活動是想為網購宣傳。問為何親自送貨？他說：「我想睇嚇同事派貨運作、流程係點樣，體驗嚇自己同事運送過程辛唔辛苦！」記者笑問街坊有否畀貼士？維基笑謂：「唔得！我啲同事唔收得貼士，何況我吖。」
女街坊對維基表示支持外，還拉住他合照。
連送幾個柯打後，維基忍不住上車飲水唞一唞。
掛上宣傳字樣的HKTV mall貨車，今日將繼續到太古和康怡派禮物。
WhatsApp死機即變陣
昨日維基聲稱共接到500個柯打，揚言禮物中以日本蜜瓜價錢最貴，他說：「有啲100蚊、有啲幾十蚊，蜜瓜最貴，我哋來貨都百幾二百蚊個。」不過，亦因為WhatsApp太多而一度死機，維基：「𠵱家4點幾，WhatsApp嘅朋友已經傳唔到，因為太多湧入去，所以block咗，暫時用唔到住，想要嘅朋友要聽日先可以再落柯打，𠵱家只可以做埋之前接嘅柯打。」維基又笑謂：「體力都用得好勁，睇嚇頂唔頂得住，費事中暑仲麻煩。」至於將來會否再到其他地區送禮時，維基就表示要再檢討決定。而因為WhatsApp死機，維基昨晚於是改為安排市民到貨車親自取禮物，看街坊反應。
對於今次豪送禮物，港視發言人鄭小姐昨說：「呢個計劃係試驗性質，所以未知下一站嘅計劃。成本方面，禮品有平有貴，總共5至6位數。」不過有不少網民在facebook鬧爆送貨不準時、過了送貨時間全沒通知，認為維基若售後服務做得不好，花數千萬宣傳也是徒然。
採訪、攝影：羅德光、吳耀輝
搶客新招：有乜禮物送？
HKTV mall昨日於太古城及康怡花園舉行「WhatsApp大送禮」，共有11種禮物供選擇，包括：
‧日本溫室蜜瓜
‧富士蘋果汁
‧野菜汁
‧午餐肉2罐
‧梅酒或柚子酒
‧芝士拉麵4包
‧檸檬紅茶
‧玄米茶
‧鮮榨橙汁
‧農心麵5包
‧忌廉溝鮮奶6罐
from:
http://hk.apple.nextmedia.com/entertainment/art/20150809/19248626
