王維基嘅香港電視已經運作成兩年，雖然到𠵱家都未得到政府發免費電視牌照，但成個團隊依然好有心咁做好啲製作，完全冇求其，其中正在埋尾、由惠英紅主演嘅新劇《我阿媽係黑玫瑰》，聽聞就會由原本嘅25集，濃縮到9集，有人話香港電視有心反傳統以質素行先。
但因為唔知幾時有得播，突然將製作緊嘅20幾集劇集濃縮到唔夠10集，難免俾人懷疑係縮皮，香港電視嘅發言人鄭小姐就否認係咁，強調係為質素：「刪短係想劇集節奏快啲，唔止呢個劇，其他劇都係，《歲月樓情》只得14集，《黑玫瑰》就一路拍劇本一路調整，套套唔同，未必套套25、30集咁傳統，最緊要套劇好睇。」至於演員嘅酬勞，就話唔會減少！
惠英紅喺劇中做女俠黑玫瑰，連老公姜大衛都唔知佢身份。劇照
陳曼娜都有份拍《黑玫瑰》，佢都贊同公司作品重視質素。劇照
夏雨（右）同鮑起靜拍嘅《歲月樓情》只有14集。劇照
讚老闆夠膽識
主角惠英紅都好贊成呢個做法：「做演員冇問題，好似美式劇咁，最緊要好睇，我哋拍攝嘅時間一樣，之前拍咗有成百場戲都刪咗，有啲鏡頭要再拍過，老闆至少唔見二百萬，佢真係夠膽識！」
另外，香港電視嚟緊開拍由小演員擔正做主角嘅新劇《4年B班》，由小朋友嘅角度去睇呢個世界，都只係得4集，對睇慣本地劇集嘅觀眾嚟講，唔係傳統25、30、40集，唔知慣唔慣呢？
from:
http://hk.apple.nextmedia ... 130730/18354889
