吳京（左）與張晉同是出身武術隊，自小已認識，多年後二人首度合作拍電影《殺破狼II》。攝影：陳慧安
吳京跟張晉兩人出身武術隊，可算識於微時。如今張晉是香港金像獎男配角，吳京自導自演的《戰狼》在內地票房超過5億人民幣。兩人從當年聚首就講手論功夫，到今日有兒有女談湊仔經。吳京笑言自家數代都是武狀元出身，故必定要其兒子習武，秉承家族傳統。
撰文：黃曉妍
吳京和張晉首度合作電影《殺破狼II》，但二人的緣份由童年開始，張晉表示：「我係四川武術隊，佢係北京武術隊，識咗好多年，隔咁多年再見番，喺戲中係咁𡁻佢，感覺好特別。」他坦言跟吳京在武術方面，不論反應、節奏、默契都是最好。吳京則說：「武術隊出嚟嘅動作演員係好少，大家細個就認識，又喺娛樂圈，要珍惜，當然同佢有默契，剛才影相，我哋打嘅時候，都唔使講太多嘢，一伸手已經知對方點打。」
吳京要囝囝學武
自細就在北京武術隊習武的吳京，曾贏過多個武術比賽冠軍，所謂行行出狀元，事實上吳京先祖就出了幾位武狀元，他說：「所以囝囝只有9個月大，但將來一定會畀佢練功夫，呢個係我屋企傳統，我哋幾代都係武狀元，練功夫可以訓練意志、堅持、堅強，𠵱家年輕人太容易得到，成日畀你甜，你都唔知苦係點樣，覺得得到係應該，其實係錯嘅，應該係要自己努力。我同老婆唔會縱個仔，心痛還心痛，但唔會縱，佢以後喺呢個社會要靠自己、要獨立，我死咗佢點？學功夫都可以保護身邊女仔啦！」會否追多個女兒﹖他笑說：「要，梗係要啦，女就最好啦，但唔一定啲，呢啲係天畀我哋，總之我想要多一、兩個，一個仔太孤單喇！」
在《殺》片中飾演警方臥底的吳京，得罪了販賣人體器官的古天樂，被囚禁在泰國監牢中，吳京逃獄的一場戲，就是其中一場大型打鬥場面。飾演獄長、打扮得西裝骨骨的張晉亦首度在片中出手，張晉笑說：「打嘅時候都好就住個西裝look，我冇擺過一個功夫甫士，好gentleman咁企，一打完都係咁企，好似冇打過咁，正如佢做完壞事，都覺得自己冇做過一樣，就係要符合呢一點。」
吳京六歲時已在武術比賽取得冠軍。
身為動作演員的張晉（右）和吳京，拍戲時拳拳到肉，真的有苦自己知。
張晉自細加入四川武術隊，曾奪得多項武術冠軍。
張晉：太太唔易做
其實演員拍打戲真的有苦自己知，張晉打到筋骨裂、額頭腫到要敷冰消腫，他說：「當我踢吳京出窗嘅時候，Tony Jaa喺後面踢我，我就撞到窗上面一塊木，好彩唔係尖嘢，如果唔係就穿咗腦。」吳京說：「最痛苦係捱打，拍電影唔係一take過，忍住再打，忍住再嚟，所以拍到好躁，平時你點打我，我都頂得住。」
他們身痛都不及太太心痛，吳京說：「我覺得老婆仲辛苦過我哋，佢係『心苦』，成日掛住我有冇受傷，當時老婆大咗肚，孕婦情緒好波動。」張晉則說：「一定會擔心，因為Ada（蔡少芬）睇唔到，恐懼感就自然無限放大，導演都唔想佢嚟探班，我生日嗰日，Ada帶埋囡囡一齊嚟咗5分鐘就即走，我都想佢快啲走，呢個環境唔係好啱屋企人喺度，不過佢會明白，因為佢都係演員，佢承受嘅嘢多過我，所以呢個太太唔易做。」
張晉與蔡少芬結婚多年，育有兩女，經常在微博曬幸福。
去年榮升人夫及爸爸的吳京，坦言怕太太擔心。資料圖片
吳京（右）表示在戲中最深刻的是與Tony Jaa對打的一場戲。劇照
張晉背泰文對白一額汗
吳京、張晉和Tony Jaa在《殺》片中拳拳到肉，吳京表示最深刻的是在泰國監牢逃獄的一場戲，他說：「Tony Jaa捉住我，我頂到佢撞玻璃，當時大家都未收力，力度大咗啲，佢真係飛咗出去，個頭落地，跟住佢再嚟打過，嗰場戲好過癮，同佢打得好興奮，終於遇到一個可以放開手腳去打、唔使遷就嘅一個演員。」
除了打之外，對張晉來說，泰文對白難過拍打戲，他說：「跟老師學咗兩個幾月，第一日去到現場，覺得自己好似冇學過咁，因為我學嘅唔係劇本入面嘅對白，到我攞到對白嗰時，一直戴住耳機，行路、食飯、瞓覺都聽住語言老師講畀我聽嘅對白，背到喇，去到現場，導演話要改少少，跟住又係另一樣嘢，咪即刻搵老師囉。」他笑謂拍到成頭汗，幸好最終找到用拼音方法，之後順利完成。
化妝：Emma Lee、Maggie Choy
髮型：Franco Chung of Hair Corner、Vince Pang of IL COLPO Platinum
服裝：Koyo、Levi's
場地提供：W Hotel
from:
http://hk.apple.nextmedia ... 150605/19172497
