《戰狼2》內地票房家陣望收50億，吳京晉身一線明星。
吳京自導自演嘅《戰狼2》喺內地截至噚日上咗18日，票房收約45億人民幣，𠵱家仲可以每日平均收約億幾，睇嚟部戲過50億毫無難度，吳京亦正式由配角變為一線頂級明星，人紅新聞自然多，乜嘢舊聞新聞都俾人挖晒出嚟寫。呢兩日台灣同內地都挖番當年佢拍《殺破狼》時同甄子丹嘅恩怨，話子丹擠壓吳京，而最近吳京出來宣傳電影時，講番舊日同子丹嘅不和傳聞，佢回應話：「謝謝他當初的看不起！」
話說吳京俾Ba叔（陳達志）睇中同佢簽經理人合約，仲投資開拍《殺破狼》畀佢同甄子丹、任達華、洪金寶合作，但傳聞話吳京戲中俾人擠壓，話佢未夠班，所以係咁將佢嘅戲份刪晒，對白都冇，到部戲上時，Ba叔想海報入面加埋吳京入去，但有人反對，後來畀吳京知道，當然好嬲，內地好多報道都認定吳京當年應該係同子丹唔啱傾！
吳京當年拍《殺破狼》嗰陣，外界盛傳佢俾子丹擠壓。
第三集有份
其實早喺《殺破狼》當年上映時已經傳過佢哋不和，不如問吓呢部戲出品人之一嘅黃柏高（Paco），佢話：「當年子丹絕對冇擠壓過吳京，呢啲傳聞唔係真嘅！我仲加咗吳京戲份㖭！當年吳京係新人好多導演都未睇得起佢係好正常，但我一直睇好佢，所以第二集已經畀佢做主角，第三集亦預佢演。」
撰文：馮仁昭
from:
http://hk.apple.nextmedia ... 170814/20120477
