噚日有雜誌爆料話李蕙敏（Amanda）前年嫁家族經營珠寶生意嘅英籍老公後，連88歲養母鄧惠珍都唔理，將養母送咗入老人院，而且不聞不問，仲話每月萬多元老人院住宿費都係鄧婆婆自己畀，暗示Amanda不孝。
李蕙敏前年與家族經營珠寶生意嘅英籍男友結婚。資料圖片
「親戚都認唔到」
馮仁昭噚日打電話畀Amanda，佢就好勞氣：「兩三個星期前，院舍話有一男一女去探媽媽（養母），仲買咗大罐曲奇餅，我已經覺得怪，因為所有親友都知道媽媽有糖尿病，冇人會買曲奇餅去，其實咁樣好危險，佢仲要成罐食曬，有乜事邊個負責？」
Amanda又話：「我入行咁耐，當然知道雜誌要題目吸引，劇情要戲劇化，但唔好搵老人家嚟搞好冇？」Amanda同馮仁昭講，佢養母其實有腦退化症，糖尿病指數相當高，又有血壓高，之前仲通過波仔，本來唔想講老人家嘅嘢，但係雜誌出咗，覺得有必要講番件事：「安排媽媽入老人院係醫生建議，因為佢每日要準時食藥、打針，又成日會暈，所以住喺院舍係最好。」講到養母嘅病情，Amanda嘆氣話：「試過日夜分唔到，夜晚走出街話要去飲茶，有時就連我同成日探佢嘅親戚都認唔到，問我哋係邊個。」
撰文：馮仁昭
馮仁昭
from:
http://hk.apple.nextmedia ... 150403/19099700
