李宗盛前晚喺台北小巨蛋開騷，全晚最感動嘅位，係佢同四個女歌手隔空對唱，現場放咗個巨型白紗幕播MV片加埋女聲，李宗盛就live對唱配合番個畫面。當播出前妻林憶蓮嘅《當愛已成往事》時，音樂一起但未唱，佢就已經好激動掩住個口想喊，之後唱到歌詞中一句「愛情它是個難題」就不停抹眼淚及幾次深呼吸，唱到最後一句「忘了你也沒有用」，佢仲呆呆咁望住螢幕中嘅憶蓮，現場歌迷就拍掌歡呼同佢打氣。林憶蓮同李宗盛婚姻維持咗7年就玩完，估唔到隔咗幾年，依然咁大反應。
李宗盛同憶蓮對唱時，不斷流淚。
林憶蓮同李宗盛嘅婚姻維持咗7年，到今日李宗盛諗起依然激動。
資料圖片
馬桶上作歌
演唱會一套衫撐足全場，仲係上年著過嘅舊衫，李宗盛話：「大家不是來看我換衣服的！」製作過無數經典名曲嘅李宗盛仲自爆好多創作都係孤單一個人喺酒店房同馬桶上面誕生嘅。另外，螢幕播放之前張震嶽、黃品源一班藝人一齊踩單車幫門諾醫院籌款畫面，佢呼籲大家發揮愛心：「你們買門票的錢，我把它拿去捐給老人，我覺得很有意義！」
撰文：馮仁昭
馮仁昭
from:
http://hk.apple.nextmedia ... 141229/18984035
