47歲林憶蓮與35歲恭碩良愈愛愈浮面，二人除共賦同居赤柱愛巢外，早前更有指恭碩良經已求婚成功，兩年姊弟戀打風打唔甩。
不過近日有指女方難忍男方溝女性格不改，加上染上惡習，決定狠心斬纜。報道出街當日，一向低調的林憶蓮竟然在fb罕有為私人感情發聲，重申與恭碩良情未變，認真耐人尋味。
本刊收到消息，二人上月底曾鬧分手，受情傷的恭碩良更一度情緒失控，上月25日擔任側田演唱會嘉賓時，更忍唔住於台上公然爆粗發洩。現時身在泰國治情傷的恭碩良，頻頻隔空翻兜憶蓮，希望箍煲成功。
慣性與音樂才子因合作而擦出愛火的林憶蓮，前年啟動世界巡唱時，與擔任鼓手的恭碩良撻着。二人寓拍拖於工作，經常借出埠開騷，結伴遊山玩水，談情說愛。
拒收蓮花
最新圖片早前，本刊拍得憶蓮單拖到中環做gym。雖然運動令腎上腺素飆升，但她落樓時依然木口木面，似受情變影響。
戴住面具的恭碩良，5月25日現身側田個唱，當時側田話台上紮花由憶蓮所送，恭聽後便立即將紮花放回架上。
激動失控
其後恭碩良情緒愈見激動，爆粗鬧側田「溝×晒啲女」，並問觀眾側田「抵唔抵×」。
網友狂插
有網友睇完當晚側田個唱，於網上狂插恭碩良台上發癲。
夾band夾出禍不過自上月起，憶蓮於內地舉行的巡唱，愛郎恭碩良卻不見影蹤，鼓手一職由幕後音樂人取代。知情人士說：「阿Jun（恭之洋名）五月初同我哋講，話因為一啲私人理由，唔可以再繼續餘下嘅巡唱。我哋當時問佢憶蓮知唔知情，佢就支吾以對。憶蓮同阿Jun合唱嗰part，好多fans都好期待。我哋想件事完美啲，咪𠱁憶蓮游說阿Jun留低囉。點知憶蓮好大反應話：『呢個世界冇話冇咗邊個唔得！』講到咁白，大家都知發生咩事，唔敢再追問落去。」
據知生性貪玩的恭碩良，近日經常以到錄音室夾band為由，漏夜竄出赤柱愛巢。最初憶蓮未有為此事擺上心，但久而久之，終於對男友起疑心。「阿Jun同咗憶蓮一齊之後，修心養性咗好多。憶蓮仲以為自己真係寶刀未老，可以馴服得掂隻野馬。但阿Jun呢排又放肆，夾band夾到天光，仲有成身怪味，憶蓮真係頂唔順。」據知憶蓮於上月24日，正式向恭碩良攤牌，當時憶蓮更語重心長叫男方要洗心革面，搣甩惡習。
樂手換人去年憶蓮於紅館開騷，恭碩良奉旨在台上與憶蓮唱〈下雨天〉調情。但上月11日上海站起，恭碩良的崗位便由他人取代。本周六（15日），憶蓮於廣州開騷，恭碩良亦冇份。
麥玲玲批：佢哋唔結就分
林憶蓮與恭碩良年齡相差11年，拍拖兩年來時有危機。玄學家麥玲玲指恭碩良命格與本命年對沖，感情今年要有突破先得。她說：「佢哋今年相沖得好緊要，感情一定有變化，如果唔結婚就係分手。而林憶蓮本身條命嘅感情運都一般，尤其係43歲至48歲，所以今年47歲嘅憶蓮要過埋今年，先有一段穩定啲嘅感情。」
打回原形從未俾女飛過的恭碩良，聞分訊後情緒激動，頻頻借酒澆愁。上月25日，亦即被撇後翌日，恭首度公開露面，擔任側田紅館個唱嘉賓。當晚懵盛盛未知情的側田，還用憶蓮與恭的緋聞開玩笑，恭一聽憶蓮兩字突然失常，說話口齒不清。當時情緒離奇高漲的他，更當住台下觀眾兩度爆粗，場面尷尬。記者曾就此事致電側田個唱主辦單位東亞娛樂，惟截稿前仍未獲回覆。
憶蓮決心斬纜，以往食好住好的恭碩良當堂打回原形，除被迫搬離赤柱豪宅外，亦冇司機冇工人任使，難怪他一時間接受不了事實。知情人士說：「阿Jun跟住憶蓮嗰陣，梗係唔使愁啦，即使平時出埠開騷，憶蓮都自掏腰包幫阿Jun由經濟艙upgrade到商務艙，又有七人車管接管送。家陣阿Jun俾人飛咗，唔怪得佢上個月靜靜雞返咗澳門嘅舊居避世啦！」
年初一家親
其實恭碩良自與憶蓮拍拖以來，努力打好與喜兒的關係，不時教喜兒彈結他。今年初，三人就被拍得於中環開餐，儼如一家親。
罕有護航鮮有公開講感情生活的憶蓮，周一（10日）報道出街後，便立即澄清與恭碩良繼續保持情侶關係，完全違反一向低調作風。
喜兒返港慰母雖然今次是憶蓮主動撇仔，但並不代表她可以無痛分手。今年47歲的憶蓮，花費大半生於情場上兜兜轉轉，遇着幾位音樂才子均冇好收場。當她甫相識恭碩良時，還以為他是真命天子。知情人士說：「憶蓮分手後情緒都好低落！好彩佢個女喜兒呢個時候喺波士頓返咗嚟，有個女陪住，憶蓮先冇咁愁。」據知原本於紐約讀高中的喜兒，因為在當地長期乏人照顧，她放學後便與不少外籍同學聯群結黨夜蒲。憶蓮勒令愛女返港，由她親自管教。
分手半個月，正當憶蓮心情開始平復，恭碩良又再出招。據知現身處泰國治情傷的恭，不時以WhatsApp求憶蓮回心轉意，芳心寂寞的憶蓮最後再被冧女高手的恭融化。難怪分手消息爆出後，憶蓮罕有以facebook回應戀情，更開腔大讚恭是beautiful person，非常肉麻。
知情人士說：「其實憶蓮喺facebook回應都係希望件事快啲平息，唔想其他人有咁多無謂嘅揣測。而阿Jun雖然好努力箍煲，但憶蓮依家仲未有定案，睇嚟阿Jun要再努力啲。」
憶蓮情路坎坷，98年與李宗盛結婚並誕下喜兒（上圖），可惜6年後離婚。直至04年，憶蓮再與陳輝虹翻撻，但兩年玩完。
天后愛湊仔中外娛圈有不少姊弟戀的例子，並且多屬女尊男卑。這批戀人當中，不少也是樂壇天后。
楊千嬅、丁子高相差6年
今年39歲的楊千嬅，07年被爆與當時冇乜嘢撈的丁子高拍拖。當時不少人均看淡這段姊弟戀，也認為男方靠女方上位。直至09年，二人拉埋天窗，丁更創立PR公司，努力洗底，去年千嬅更誕下兒子Torres。
蕭亞軒、柯震東相差12年
蕭亞軒和柯震東這對可謂是姊弟戀的台灣代表。2011年，當時31歲的蕭被爆撻着19歲的《那些年》主角柯震東，當時不被看好。不過二人現時發展穩定，早前蕭更被指與柯全家人同遊澎湖。
麥當娜、巴西肌模
相差28年
感情屢敗屢戰的麥當娜，於09年50歲時，於派對中搭上當時只得22歲的巴西嫩口肌模Jesus Luz。姊弟戀見光後，Jesus火速上位，獲邀拍攝D&G代言廣告。不過這段戀情來得快去得快，拍拖七個月便玩完。
