現年53歲嘅蔡楓華（Ken）三年前終於完成紅館演唱會夢想，但早排佢又同歌迷講話會再入紙申請紅館檔期，不過最後申請唔到，轉去荃灣大會堂開騷，個場雖然同紅館差好遠，但票價竟然用紅館巨星價，最貴580蚊飛㗎。收得人咁貴飛，梗係要畀更多好嘢同歌迷睇啦！上個禮拜三（8號），阿Ken同「六中女」一行七人去又一城嘆茶，而唔係排舞練歌或者好似一般歌手咁去跑步練氣。
下個月就開演唱會嘅蔡楓華身形依然腫脹，完全冇收身跡象。
噴口水花
距離開騷得番一個月，佢嘅身形仍然相當膨脹，就算全黑打扮，都遮掩唔到佢嘅肥腫身形，佢又幾次拎眼藥水出嚟滴眼，睇嚟眼乾問題都好嚴重嚇。唔知係咪情人眼裡出西施？六中女明顯唔介意Ken嘅肥腫身形，佢喺酒樓大噴口水講唔停，大家依然聽得好投入，六中女離開酒樓嗰陣，更刻意等Ken行頭，然後佢哋跟住後面行，搞到佢好似巨星出巡咁，唔少舖頭職員走出店外睇嚇邊個咁大陣仗，最後佢同六中女分坐兩架的士離開，上車前中女仲幫佢開車門，認真架勢。
撰文：馮仁昭
From:
http://hk.apple.nextmedia.com/entertainment/art/20141015/18900054
