名模蔣怡（Coco）與珠寶設計師翁狄森（Dickson）共同生活14年，2006年，Coco赴台灣發展，一去便是4年半，今年，Coco又赴倫敦圓學廚夢，兩人之間，離別差不多每隔7年便出現一次，按照這個循環，Coco竟大叫不錯。很多人說他們是怪夫妻，Coco卻樂在這種有愛的怪行。
蔣怡是名副其實的「美女廚神」，而出外學廚是她的夢想。
蔣怡（Coco）說：「Dickson成日講，話喺人哋眼中佢係好奇怪，但我都好怪，哈哈，不過我哋有分別，佢會反思，但我就唔會理人點睇。」她續說：「我覺得怪唔係壞事，太普通好悶囉，佢係藝術家，天馬行空，一日有100個ideas，沖個涼都有50個ideas。人哋會覺得我怪，覺得我明明係一個model，又走去學廚，唔鍾意shopping，鍾意去非洲睇動物，鍾意去亞馬遜過夜，我唔會去fashion week，最啱去美食博覽，我都覺得係怪物，喺森林先搵到自己。」
Coco喜歡美食，只要嘗過一口，她就有本事照辦煮碗烹調出來，廚藝了得，在朋友之間早已奉她為美女廚神，因為喜歡吃，故做飲食節目視為一大樂事，可以讓她飽嘗世界各地的美食，而出國學廚其實一早在她的計劃之中，只是去年她突然懷孕，同年誕下女兒翁容，學廚計劃被迫擱置，她說：「依家有BB，有事業，雖然好鍾意學廚，但好難放低所有嘢去追求夢想。」
蔣怡由老公翁狄森陪到倫敦，不忘將囡囡的照片收藏在平板電腦中帶在身旁。
蔣怡不甘做家庭「煮」婦，要為自己的事業努力。
一夜變天
自從翁容出世後，她的生活起了翻天覆地的變化，當中的犧牲，換來心情忟憎，她說：「我覺得自己唔可以由朝到晚做媽咪，我鍾意有自己嘅工作，工作完後返去同BB玩，依家日日留喺屋企我會癲，（唔適合做家庭主婦？）係，會脾氣好差，唔開心，以前一向係翁生照顧我，但一夜之間，我變咗媽媽，但佢冇變做爸爸，由我照顧一切，佢可以繼續做自己鍾意嘅工作，見到BB喊就即刻畀我，我就要留喺屋企！」
蔣怡感激老公兩度「放生」，讓她尋夢。
蔣怡與翁狄森為女兒翁容慶祝週歲生日。
愛吃的蔣怡，做飲食節目視為一大樂事。
重獲自由
但其實Dickson一一看在眼裡，並決定讓太太「重獲自由」，她說今年五月，Dickson突然跟她說：「冇嘢係冇可能，要去就依家去。」隨即為她上網搜尋巴黎藍帶廚藝學院課程的資料，以及入學資格，最終找到倫敦分校，Coco亦順利通過英文入學試，由五月著手找學校，到九月底出發短短四個月間，Coco無需費神，完全在Dickson的悉心安排下達成。Coco攻讀的課程由今年九月至明年六月，為期九個月，明年六月時，翁容仍未滿兩歲，兩人的如意算盤是，小朋友不會有兩歲前的記憶，對小朋友影響最小。
感受夫愛
2006年時，Coco曾經到台灣發展一段長時間，斷斷續續與Dickson分開4年半，相隔7年，Coco再去倫敦學廚，對於Dickson兩度「放生」，Coco感受到老公對她的愛，她說：「身邊好多人都戥佢驚，啲auntie都話佢做乜又畀Coco走？翁生識玄學，佢話人6年就會心鬱鬱，7年就會變，如果第6年分開嚇，兩個人就唔會分開，所以再下一個7年，佢又會叫我走，哈哈。」
她大讚Dickson的確對她照顧有加，被對方寵壞，寵壞程度是不能夠一個人到外國生活，故是次倫敦學廚，Dickson也親身陪伴她到倫敦，為她安排起居飲食後才返港，這份愛，Coco又怎會感受不到！
無師自通
Coco廚藝了得，但原來她從未讀過烹飪班，是無師自通，民間廚神。
她說：「冇人教我，但我乜都識煮，好多基本功夫都係無師自通，有時只係睇嚇個菜譜，自自然然識煮。」所以她經常向Dickson說：「你娶咗個廚師返屋企係執到，佢永遠唔會放假。」雖然下廚沒有難度，但她決心進修廚藝，希望可以到世界各地跟名廚學習，為將來開設自己的美食小店作好準備。
採訪：Tracy Leung
攝影：張福宏
髮型：Roy Yan @ Queen's Private i
化妝：Chris Chan @ Summer Shell
服裝：TOPSHOP
場地：The First Floor
From:
http://orientaldaily.on.c ... /00282_084.html
