蔣怡產後復出第一擊做有線節目，睇佢湊女似模似樣，唔似新手媽咪喎。
蔣怡daddy好後生，打扮仲幾潮。
現年36歲嘅蔣怡，今年7月為老公翁狄森（Dickson）生咗B女翁容（小嗡嗡）。呢位潮媽復出螢光幕第一炮，就係幫有線拍嘅真人騷《蔣怡的前4後6》，由佢大肚開始講到佢生完BB坐月嘅事，節目喺嚟緊星期日（13號）晚開始，逢星期日喺有線高清奇妙娛樂台播出。
節目中，蔣怡話初期以全人奶餵囡囡，唔只要24小時候命，仲要忍受乳房脹痛同乳頭受損痛苦，佢話：「頭嗰幾日因為谷奶，件衫掂到個乳頭都痛，我全日要吊起件衫離開個胸咁行，過程中亦試過損咗，痛到癲！」蔣怡生女之前曾誇下海口，話用自己啲母乳製成「人奶雪糕」請好友食，結果因為個女好大食，蔣怡冇奶剩，所以無法實踐承諾，惟有喺鏡頭前向朋友耍冧。
搞女婿選拔戰
蔣怡除咗喺大肚前參加孕婦瑜伽班之外，仲喺未生同生咗之後，搞咗個別開生面嘅未來女婿選拔戰，希望幫囡囡揀定男友，甚至老公。當日佢請咗幾個小情人嚟應徵，連玩開塔羅牌嘅姚安娜個細仔James都嚟應徵，幾個小男孩又天才表演又玩花生騷，真係好熱鬧。喺第一回選婿中，蔣怡已經特別鍾情姚安娜個3歲仔James，點知蔣怡生完之後帶埋小嗡嗡「相睇」時，James淨係冧蔣怡，唔吼小嗡嗡，搞到蔣怡忍唔住笑話：「佢好有藝術家脾氣，我好鍾意！留番佢畀我，唔好畀我個女揀，估唔到我同個女爭仔！」
版主：陳基征
蔣怡帶囡囡同姚安娜個仔James相睇，認真心急。
蔣怡參加瑜伽班，保持身心健康。
from:
http://hk.apple.nextmedia ... 131009/18455302
