向來諗頭多多的阮兆祥，繼早前舉行兩場叫好叫座的演唱會後再有新搞作，師承志偉的他將以自己引以為傲的「食字」本領帶上舞台，舉行三場「硬食」棟篤笑，實行「笑死冇命賠」。
阮兆祥開騷向觀眾大放笑彈，直言師承志偉將「食字」本領帶上舞台。
近年在電視螢光幕內扮嘢扮到出神入化、向觀眾大放笑彈的阮兆祥，早前踏上舞台舉行過兩場演唱會後外界反應理想，祥仔決定在11月21至23日乘勢再度踏上舞台，但原來祥仔今次並非舉行演唱會Part 2，而是嘗試挑戰棟篤笑，祥仔說：「我多年嚟一路睇黃子華同張達明嘅棟篤笑就諗，佢哋咁做法究竟到我自己會點做，所以就好想試自己嘅第一次。加上我團隊提議做演唱會Part 2，但我想做一樣新嘢，所以決定搞棟篤笑。」
最緊要引人笑
祥仔表示今次的棟篤笑以「硬食」為主題，他說﹕「因為『食』係我興趣，亦都係專長，搞笑有好多唔同形式，其中一個係『食字』，係師承曾志偉先生，佢係『食字』派始祖，但志偉近年已經放低咗呢個絕技，啟發咗我就繼續鑽研落去。」
常與曾志偉一同主持的阮兆祥，指對方為「食字」派始祖。
早前開騷的阮兆祥，邀請陳敏之做嘉賓。
提起「食字」即滔滔不絕的祥仔落力講解：「比較一個傳統笑話令大家笑，要花起碼分零鐘時間，但『食字』Gag就係即刻令你笑出嚟。」同時無懼被標籤爛Gag，滿有信心的他說：「爛冇所謂最緊要令你笑，你笑住口話我個Gag好爛，但你都係笑，呢樣係最緊要嘅目的。」他即刻示範﹕「就用語言做例子，一個英文嘅食法就係，食飯會食飽，食藥會病好，食咩會行來行去呢？答案係Security咪會行來行去，雖然係爛，但大家好快就會笑囉。」
保留唱歌環節
希望帶給觀眾們新鮮感的祥仔又透露﹕「入面會有唱歌環節，有搞笑有認真，嚟睇嘅人都係電視觀眾多，希望有唔同嘢畀大家睇，嘉賓方面我希望係貴精不貴多，上次演唱會就有好多朋友，所以今次每場一個嘉賓想同『硬食』主題有關係。」
文：曹家誠
攝：秦健輝
場地：和幸吧
化妝：Tiffi Wong
髮型：Eddy Kwong
From:
http://orientaldaily.on.c ... /00282_099.html
