譚耀文今年回流拍港產片，狀態大勇，日前接受本報專訪時，特別要求給他半小時「谷線條」後才拍照。攝影：陳志嵐
80年代參加新秀歌唱大賽得到冠軍入行、現年46歲的譚耀文，歌、影、視瓣瓣撈勻，99年憑電影《野獸刑警》拿過香港電影金像獎的最佳男配角後，隨即到內地發展，由配角做到男一號，有傳他拍一套劇有千萬片酬，阿譚今年卻選擇「回流」拍港產片，原來即使內地工作長做長有，但缺少時間見仔女，所以阿譚決定重新規劃他的人生。
撰文：王連連
這麼多年來，譚耀文外表沒多變化，只是身形略為發福，他聲言要積極收身：「早前拍《救火英雄》遇番華哥（任達華），大家十幾年冇見，佢仍然好fit好靚仔，但佢見到我就問：『阿譚你冇嘢嘛？身體冇事嘛？』聽完佢咁講，嚇到我火速減肥。舊年拍《踏血尋梅》遇到郭富城，佢日日除衫開工好fit，推動我更加要勤力。不過我都有皺紋㗎，證明我冇打針。」
圈中人大呻香港巿場萎縮，阿譚卻選擇這時回歸，他說：「之前返內地，目標要拍好多唔同角色。呢兩年覺得喺內地已攞到滿足感，所以部署返嚟，多啲時間陪小朋友成長。」
譚耀文返港發展後，不用開工的日子常陪仔女出外逛街購物。資料圖片
譚耀文自言初到內地演戲，最大困難是要克服講普通話。
《縱橫四海》帶挈賺人仔
在眾多的角色中，阿譚最令人印象深刻是劇集《縱橫四海》的明志傑、電影《野獸刑警》的㩒釘華，被奠定壞人形象：「拍完《縱橫四海》多咗內地人識我，令我有機會北上，第一套同張衞健拍《小寶與康熙》，06至07年開始拍電影。如果唔係有明志傑呢個角色，我唔會演咁多反派。」
當初到內地演戲，阿譚最大難關是克服講普通話：「由唔識講到用普通話講對白，都有蝦碌，試過做一個籌款活動，要我周街問人或者施捨，但當時普通話好差，人哋聽唔明。又試過做中央台一個大型節目嘉賓，要用普通話介紹動漫電影、3D拍攝器材等，好多學術性嘅字要記，我震咗兩晚瞓唔到，後來勉強過關。」
阿譚內地工作長做長有，收入豐厚，但當女兒出世後心態開始改變：「雖然好多戲拍，但好似覺得同理想背道而馳，又冇時間見個女，除咗返嚟幫囡囡剪臍帶外就冇見過佢，直至佢8、9個月大，我就決定返嚟香港重新規劃工作同人生。」
譚耀文（中）在第七屆新秀歌唱大賽贏得冠軍。資料圖片
99年譚耀文（右）憑電影《野獸刑警》獲頒香港電影金像獎「最佳男配角」。
抽時間多與兒女溝通
育有一仔一女的阿譚，家庭對他來說是人生最重要的部份，他說：「小朋友會調節你嘅心態，令你有鬥志動力。明明唔開心，見到佢哋就開心。但小朋友好現實，見你唔識錫佢又唔呵佢，就唔睬你，有事搵媽咪，所以有時間我會同佢哋多啲溝通，講吓拍戲趣事。佢哋鍾意睇我做奸角，但我俾佢哋睇一套做反派，就睇番一套做正派，中和番。」
化妝：Terence C.
髮型：Oscar Ngan of ii hair& nail
場地提供：Fight Factory GYM Ltd.
from:
http://hk.apple.nextmedia ... 150814/19254443
