鍾舒漫與湯怡，一個外剛、一個溫婉，驟眼看似風馬牛不相及的兩個，原來私底下親如姐妹般互相「改造」。閨密倆先後覓得圈中另一半，更卸下偶像包袱大方公開戀情，二人直認刻下感情生活漸入佳境，異口同聲形容男友地位相當，並笑指約定了來一次「四人遊走世界」，欲經理人公司能夠成人之美。
湯怡（左）與鍾舒漫各自找到愛人，感情要好的她們最期待可以四人一齊去旅行。
K：湯怡（Kathy）
S：鍾舒漫（Sherman)
性格爽朗的鍾舒漫勇於接受挑戰。
鍾舒漫最欣賞男友吳浩康的音樂才華，更早已視對方為家人。
同期公開戀情
K：我哋之前竟然差唔多時間公開戀情喎。
湯怡與洪卓立同期出道，更因客串MV而結緣。
體貼的湯怡擅長整甜品，相信令洪卓立大飽口福！
外表柔弱的湯怡亦有豪氣的一面。
鍾舒漫樂於為朋友分憂和給予鼓勵，令湯怡的性格亦變得熱情。
S：你先嘅，其實我冇話唔公開，不過只係畀人影到先，咁點都有「被動式公開」嘅感覺。你厲害啲，幾年都未踢爆，算係傳緋聞啫。
K：今次選擇公開，係因為有本雜誌無端端寫我簽約電視台做咗花旦，就想同洪卓立（Ken）分手，但依家公司前途未卜，我就想食回頭草……佢睇到之後好嬲，覺得要公開以正視聽。
S：我都知你兩個好sweet，經常約埋一齊健身、踩單車，好正能量呀。
音樂牽紅線
K：提起吳浩康（Deep），你都笑得好甜啦，欣賞佢啲乜？
S：一直都好欣賞佢音樂方面嘅才華，佢開騷我會喺台下好似小粉絲咁，一早已經感覺如家人。因為我性格爽朗，佢當正我係細佬一樣，總之音樂就係我哋之間打開心扉嘅一條重要鑰匙。
K：我就因為客串Ken嘅MV同佢結緣，大家又差唔多時間出道嘛！我覺得佢唱歌好好聽，遲啲我要拍微電影，戲裡面要唱歌，我都想請教佢。唔知點解好驚喺佢面前「獻醜」，有次我做騷，佢竟然靜雞雞叫我助手錄條片畀佢睇，之後有日佢忽然同我講「其實你都唱得幾好」，我先知發生咩事，有種被出賣嘅感覺囉，哈哈！
S：未來嘅嘢其實冇人知會點，但我相信即使有任何變卦，我同Deep都會係瞭解彼此嘅好朋友。決定由友情再踏前多一步，我哋好順其自然，我個人因為宗教信仰關係，永遠hope for the best，就如韓劇《來自星星的你》的千頌伊講過：「咩都唔敢試，做人仲有乜意思呢？」
互相影響性格
K：其實我最想係可以安排到我哋4個一齊去一次旅行，不過大家同一間公司，一次過走咗4個artists似乎貪心咗啲。
S：希望將來有機會啦。話時話，好多人都可能會覺得單睇我哋嘅外表，好難想像會夾得埋一齊。
K：我想講好耐嘞，你真係改變咗我好多，以前我唔係好識同人溝通，係你令我變得「熱情」。你仲係一個好好嘅聆聽者，從來唔會同我講「你應該點……你應該點……」，所有決定都會交曬畀我，你只會從旁支持及鼓勵。最開心係遇到你妹妹有時喺北京返嚟，你兩個大細路碰埋就會令我哭笑不得，但感覺輕鬆自在，又拍埋啲無厘頭短片放上網，只可以用「騎呢」嚟形容你哋囉。
鍾意煮飯仔
S：我就覺得你會係個賢妻良母囉，入得廚房出得廳堂，睇你幾疼錫自己隻狗就知啦。外人可能畀你嘅柔弱外表呃到，問心嗰句你有豪氣同爽直一面。
K：可能同其他閨密相反，我哋好少會約出去行街睇戲，最鍾意係匿埋喺屋企玩煮飯仔，你整嘅生菜包令我回味無窮呀。
S：我係你粉絲就真，好欣賞你整嘅甜品，你仲好有心思，將製甜品嘅每一個步驟輯錄成15秒短片，輯錄上Instagram，我成日like o架。早幾日我喺度執自己嘅hard disk，先發現我哋啲舊照，大家聚埋一齊過生日，當時我仲係長頭髮添。其實2007年出道嘅新人有個group喺WhatsApp，最近我都會傳番啲舊照畀大家緬懷一嚇，好開心見到好多個仲可以留喺圈中，繼續為自己嘅理想而戰。
外剛內柔爆正能量
鍾舒漫拍照時，稍稍留意就會發現她只要收起笑意，樣子就酷爆，令人「望而生畏」，她聞言即伸了伸舌頭，搞鬼謂：「唔好意思，都係媽咪生成我咁﹗」
雖然擁有「鐵一般」的外表，但她對人的關心及體諒卻打從心底出發，作為基督徒的她不會強求身邊朋友走同樣的「宗教路」。儘管曾經「引領」湯怡返教會，但卻不會「夾硬來」：「每個人都可以有自己嘅選擇同體會，冇得逼嘅。」而湯怡亦有感好姐妹的正能量源於宗教。
from:
http://orientaldaily.on.c ... /00282_070.html
