還清無扨債 羅嘉良部署做亞視一哥44歲的羅嘉良（撈家），03年約滿無線後，轉投寰宇電影，5年來一直專心在內地搵「人仔」。最近亞視掀起挖角潮，羅嘉良頓成搶手貨，成為兩間電視台的爭奪對象。上周二（7月10日），羅嘉良接受本刊訪問時，坦言8月會先跟無線拍劇還債，之後不排除跟亞視合作。
其實羅嘉良自從向外闖後，估計已賺超過3千萬。本刊連日在愉景灣發現一度跟他傳出婚變的太太方敏儀，絕對是持家有道的賢內助。搵夠錢又有好老婆睇住頭家，羅嘉良絕對有心有力再做電視一哥。
亞視自從查氏入主後，即時招攬無線幕後舊重臣，最近再向幕前藝人埋手。跟無線已經冇經理人合約的羅嘉良，亦成為首批挖角對象。據知，羅嘉良跟無線只剩一套劇集合約，為怕他蟬過別枝，無線早前更出動高層跟羅嘉良傾合作計劃。
月租10萬豪宅
羅嘉良年前由自置的愉景灣海澄湖畔二段2千呎獨立屋，搬到現在約10萬元月租的海蜂徑3千呎向海獨立屋，愈住愈豪。
唔排除過檔
上周二（7月10日）羅嘉良接受本刊電話訪問時，對於成為搶手貨，他以一貫開朗的笑聲作開場白。
（羅＝羅嘉良、忽＝記者）
羅：都係大家俾面啫！真係要多謝TVB 成日重播我啲劇集，等你哋唔會忘記我嘛！
忽：同寰宇經理人約仲有幾耐？有無機會簽番TVB 呀？
羅：我同寰宇到09年先約滿。
忽：你係咪嚟緊會拍無線新劇？
羅：係！20集嘅時裝劇，叫做《當狗愛上貓》，會同胡杏兒、呂方合作，8月頭拍到10月左右。
忽：想快啲還清晒啲劇債？
羅：一來係想還債，二來Tommy （監製梁家樹）佢好有誠意，加上今次係要同啲貓貓狗狗合作，真係好有挑戰性，你知我一向都鍾意挑戰高難度㗎啦！
忽：拍完係咪同無線冇晒約呀？
羅：係！叫做還晒債。
忽：咁咪隨時可以同亞視合作？
羅：呢啲嘢留番俾經理人（寰宇）替我傾，佢一定會幫我選擇最好條件嘅。
忽：咁咩條件先係好，係咪邊間出得多啲錢？
羅：唔係要吓吓講錢嘅！誠意同埋合作氣氛同環境都咁重要。
忽：有傳話你響大陸發展咗5年，就搵咗3千萬，係咪真㗎？
羅：唔好講錢啦！費事俾稅局追呀！
羅太相夫教子
羅太方敏儀自放棄電視台的工作後，專心在家相夫教子，上周一（7月9日）外出時打扮相當隨便，遇上記者採訪她亦笑晒，看來非常嚮往做家庭主婦的生活。
名利雙收
羅嘉良在無線已是一哥，今次亞視向他招手，條件一定很優厚，再加上亞視嚴重欠缺小生，羅嘉良過檔肯定做硬一哥。據知，現任亞視營運總裁何定鈞（前無線董事及集團總經理）亦落足嘴頭。舊老闆重金禮聘，羅嘉良亦心大心細。
對於斟羅嘉良過檔一事，亞視公關部發言人表示：「我哋當然好希望同佢合作，其實雙方一路都接觸緊，將來當然唔排除有合作機會啦！」
羅嘉良與胡杏兒02年在《流金歲月》合演兩兄妹，想不到六年後他在即將開拍的劇集《當狗愛上貓》中，與杏兒合演一對情侶。
5年賺3千萬
貴為視帝的羅嘉良，5年前返內地發展，已經以一線男演員身價接拍劇集，估計平均約12萬一集，以20集一套計算，每套至少賺過2百萬，所以佢發咗都冇人知。
＊羅嘉良拍劇已賺過3千萬，還未計電影、登台及廣告，條數都幾襟計。
北上搵銀
羅嘉良在內地發展多年，今年終於達成心願，在中央台劇集《狼煙》中飾演現代軍官。
羅嘉良上月到揚州宣傳電視劇《狼煙》，被大批內地女影迷包圍著，還有女fans 主動挨著他，相當好艷福。
本周一（7月16日）晚羅嘉良出席寰宇電影的新戲《男兒本色》首映禮，心廣體胖，看來在內地發展確實相當順利。
