為爭取參與周星馳執導新片《美人魚》的演出，13位海選女包括香港代表「寸嘴Barbie」夏尉喻、蔚雨芯（Rainky）、許雅婷（Kabby）及松岡李那，連日來在深圳積極受訓，準備在今日「美人魚13強選拔賽」中爭取好成績打入最後四強。
憑「媚忍魚」rap歌自我介紹短片成功出位的Barbie，因為不懂水性，初初接受訓練時僅能浮水及擺動pat pat，被嘲笑似海獅多過美人魚。經過5日訓練後，Barbie雖然能夠游一小段及潛水，但見她水中打轉一圈仍十分吃力，相反，蔚雨芯表現越戰越勇，在水中施展王小虎的絕技「電光毒龍鑽」，更連轉7次，大有機會殺入決賽。
有信心令星爺溶化
雖然Barbie游水潛水也明顯輸蝕，但她仍自信心十足，在泳池邊搔首弄姿轉來轉去，但卻似海獅又似一條被沖上岸的魚在垂死掙扎！Barbie昨說：「點解之前會浮咗喺水面？因為根本我唔識游水，何況叫我潛水！𠵱家學識好開心，好有成功感。」Barbie更表示一直期望見到星爺，對於星爺被指態度高傲，Barbie日前受訪時表示有信心令星爺溶化，她說：「最欣賞呢類型男士，相信任何囂張同寸嘅男士見到我會有柔情一面。」當日Barbie還再示範之前於北京參加甄選活動時rap的改編歌，誓要當上美人魚。
至於蔚雨芯則說：「本身我好鍾意游水，但唔係好叻，嚟咗深圳上咗兩堂游水就學識呢啲花式，好似條海豚咁樣。」蔚雨芯期待打入決賽及見到星爺，她說：「始終佢係偶像，一個影響力好深嘅人。」今日13位海選女將進行演技考驗、catwalk、跳舞、人魚游水等比試，有傳星爺也會現身頒獎予四強。
採訪：嵐山、卓寶花
攝影：沈健程
From:
http://hk.apple.nextmedia ... 140915/18866238
