現年33歲嘅黃榕可能係全香港最成熟嘅寫真𡃁模，前晚喺尖沙嘴搞咗個寫真破萬慶功派對，綠魔Karl、趙哲妤、Naomi、LuLu等撐場。榕姨身穿白色羽毛衫谷胸露腰，就連入面條白色褲仔都黐埋羽毛。佢跳舞時又碌地又擘髀完全唔錫身，而last pose就由兩個大隻佬抬起佢做老江湖擘一字馬，點知樓底太矮，榕姨頭頂上天花，現場幾十個男fans當然睇到眼都唔眨。
33歲嘅榕姨雄心壯志，已準備明年寫真造型。
狂寸Barbie
榕姨話本寫真有老闆贊助，太好賣會加印一萬本，問點解唔叫老闆畀錢？佢話：「如果真係畀，就唔接受。」佢仲諗埋出年會用閃石黐重要部位扮美人魚，問點解唔去北京試鏡拍《美人魚》，佢明寸夏尉喻（Barbie）話：「我唔識游水，我驚人話我未準備好，我都要學嚇rap先。」榕姨聲稱今年18歲，問佢係咪打算出寫真出到80歲？佢話：「我唔想set一個年紀限制自己，總之keep住會性感。」對於Bella控訴被朱主席搣屁股，曾同朱主席喺商場跳舞時疑遭胸襲嘅榕姨即劃清界線：「我都疏遠佢，驚佢今晚不請自來。」
撰文：馮仁昭
From:
http://hk.apple.nextmedia ... 140901/18851445
