2014年的夏天來得特別快，今個6月係香港130年以來最熱，熱到街都唔想出，更加想去旅行抖暑。位於釜山金海市的樂天水上樂園剛於5月底揭幕，有超大型衝浪池Giant Wave、兩條百米長滑水梯，夏日炎炎消暑首選！市內首個動物園亦於4月開幕，玩完水，可以放慢腳步親親小綿羊，順道轉機落埋濟州島，新開嘅Hello Kitty博物館啱曬小女孩，小男孩則可以去航空博物館學揸飛機，又好玩又有嘢學！女士們想去韓國shopping追星，拖住剛睇完世界盃仲high緊嘅老公、放暑假嘅小朋友，一家大細，南下去釜山、濟州，玩勻新景點啦！
釜山 最大水上樂園 兩米高巨浪
巨浪池捲起的浪成2米高，為咗安全起見，泳客一定要租救生衣（$46），著咗先可以落水。
釜山一向俾人感覺較首爾沉悶，最近終於有新嘢，全韓國最大的水上樂園今年5月落成，地點係距離金海機場半小時車程嘅金海市，對遊客嚟講非常方便。樂天水上樂園全場面積超過12萬平方米，一入場，見到室外大概分為三部分，最搶眼係大水桶Giant Aqua Flex，連住成個遊樂園區，有六條高度弧度各有不同的滑水梯，最高一條有三層樓高，最重要係分流做得好，人唔多，可以玩曬咁多條！嫌小兒科？仲有兩條過百米長的大滑水梯，一個叫Tornado Slide，其實即係大喇叭，坐喺大水泡上以90度俯衝，跌入喇叭部分就似鐘擺被左右拋動，離心力好勁！另一條Double Swing Slide，都係用大水泡玩，比大喇叭長同多彎，利用高速水流增加快感，差唔多200米嘅滑水道，一分鐘就玩完！位於室外嘅巨浪池係世界第三大沖浪池，池的盡頭有個人造火山，火山爆時翻起巨浪，有成兩米高，湧過來點都走唔切，一個巨浪撲起照頸淋，爽！水上樂園另一賣點係園區有水療區，玩到攰可以去按摩池浸嚇休息嚇。令人奇怪嘅係，明明話係韓國最大水上樂園，大型滑水梯只有兩條？原來仲有六條下年5月至有得玩，而家當係陪小朋友，玩住啲小兒科嘅先啦。
水上樂園內唔用現金，只用電子貨幣，要買嘢食嘢就要拎電子匙去增值。
室內部分似兒童樂園，有縮細版嘅衝浪池同大水桶，最啱小朋友。
Tiki Spa設於室內部分，建議唔好下晝同阿豬媽爭位，喺室外玩完先入去慢慢浸。
Giant Aqua Flex每一條滑梯都有救生員當值，小朋友玩得安全，家長最放心。
飄流河係水上樂園中不可缺少嘅項目，Tiki River全長200米，橫跨室內同室外兩個園區。
紅色係Tornado Slide，藍色係Double Swing Slide，用同一款的六人水泡，工作人員會湊夠六個人一齊玩，可以趁機認識韓國oppa。
樂天水上樂園地址：金海市長有路555（新文洞）電話：（+82）1661-2000網址：
http://www.lotteworld.com/waterpark/index.asp
開放時間：（室內及室外）7:30am-10pm，（Spa）9am-10pm全日券：成人$447，小童$354下午券：（2:30pm後入場）成人$370，小童$270夜間券：（5:30pm後入場）成人$254，兒童$200交通：可乘金海輕軌電車至機場，轉乘的士前往，半小時可到，車費$231
釜山 首個動物園
三井公園每日下晝都有趕羊騷，兩隻牧羊狗喺工作人員指示下將十幾隻羊趕入欄，現場小朋友拍爛手掌。
釜山有韓國最大嘅釜山水族館，4月又多個動物園。三井公園佔地八萬五平方米，仿照森林設計，成個公園被高聳嘅大樹包圍，即使身處戶外都唔會覺得悶熱。公園內有超過120種動物，唔單只齋睇咁簡單，仲可以作近距離接觸。小朋友可以伸手摸圍欄內的雞仔及白兔，現場有工作人員教導正確手勢，真係讀萬卷書不如親身玩一次。睇雀仔嘅Buzz Camp一樣夠開放，所有雀仔無籠困住，飼養員拍一拍帳篷，雀仔在遊客頭上群舞亂飛，起初嚇一大跳，第一次咁近距離有一大群雀仔在頭頂飛過，非常壯觀。睇完接觸到嘅小動物，行去Walking Safari園區，有齊海陸空各種動物，大如長頸鹿、大象，小如企鵝、野生猴，仲有瀕臨絕種的黑熊同西伯利亞老虎，對於生活於石屎森林的城市人嚟講，可以一邊睇動物一邊散步，真係好奢侈！淨係睇動物驚好悶？公園裡面仲有其他玩樂設施：近期大熱嘅4D影院、繩網陣等等，仲有由美國國立公園引入的迷宮，平均需時20分鐘才完成，如果你10分鐘之內玩完有禮物送！喺香港成日玩密室逃脫，去到韓國梗係要挑戰嚇！
之前曾經喺日本上野公園見過狐獴，原來三井公園都有，仲難得見到佢哋用兩隻腳行。
雀鳥Buzz Camp無遮無掩，仲可以叫工作人員將鸚鵡放喺手臂上影相，仲唔post上facebook呃like？
迷宮的間隔每兩個星期換一次，唔驚有人放上網出貓。
公園內有多個開放式園區，可以俾小朋友親手感受小動物，不過呢位妹妹好似有啲驚。
到訪當日，動物們的舉止唔尋常，以為佢哋打架，問工作人員之下先知係行事中，Oops！
三井公園The Samjung Park地址：釜山市釜山區草邑洞45電話：（+82）51-811-8800網址：
http://www.samjungthepark.com
開放時間：9:30am-7pm入場費：成人$146，高中生$131，小童及長者$116交通：釜山地鐵1號線西面站下車，轉乘的士約13分鐘
水產市場食蟹 講價平一半釜山最出名海鮮，好多人都識去札嘎其市場搵食，識食梗係去位於東北邊嘅機張郡食松葉蟹！機張附近有港口，水產店都係喺呢度落貨，令成本價較市中心的平四至五成。機張市場被當地人稱為蟹村，因為有超過60間食蟹專門店，機張的松葉蟹由俄羅斯來貨，全年都係當造期，幾時去食都得。平時喺札嘎其食蟹閒閒哋$500一個人，喺機張市可以講嚇價，幾個人share一隻重秤嘅，平均$300有交易。大大隻松葉蟹蒸好之後，店員仲會幫手拆曬先上菜，啖啖肉，一試難忘！
食蟹最麻煩就係要剝殼，機場市場內的蟹店都有靚妹妹店員，將蟹肢解後上碟，大飽口福仲有眼福。
一等大蟹地址：釜山市機張郡機張邑大羅里436號（釜山銀行及友利銀行之胡同）電話：（+82）51-721-2050
濟州 亞洲最大 航空博物館
咁多架飛機邊有咁多地方show曬？有接近十架大大小小係吊喺空中。
濟州比釜山更大自然，喺雪綠茶園一望無際嘅茶田，今年4月，附近出現一幢外形貌似UFO嘅建築物，名為濟州航空宇宙博物館，係全亞洲最大嘅同類型博物館。入面有航空同宇宙兩個主題，一樓展覽飛機，一入門口已經見到吊住幾架實物飛機，室內有23架、戶外有12架，始終睇實物點都好過睇模型！客機、軍機、戰鬥機等等之外，仲有飛機嘅內部構造、飛行模擬，飛機迷可以玩足一日。二樓係天文宇宙館，包含觀星、星座，還有人造衞星、登陸月球等記錄，有一個主題館播放有關太空的5D短片。繼3D、4D之後，終於出到5D，一行朋友睇之前都唔知何謂5D，現場工作人員解釋，影像有如穿過身體。戴上3D眼鏡，見到隕石向我迎面衝來，下意識避開後，隕石在我身後出現，非常過癮！博物館以互動形式帶出知識，唔使擔心睇唔明韓文，除咗展板上有英文介紹，駐場仲有國語導遊，小朋友都聽得明。
二樓的太空館展示太陽系星體及人類上太空的歷史。
5D影院的短片大概10分鐘，有英文版及中文版可以揀。
想扮嚇《衝上雲霄》？有飛行模擬器可以體驗，唔識玩的話，現場有人教你玩。
同行男性朋友話睇飛機，識睇梗係睇引擎，難得近距離任影。
濟州航空宇宙博物館地址：西歸浦市安德面綠茶盆栽路218（西廣裡2489-1）電話：（+82）64-800-2000網站：jamblog.co.kr開放時間：9am- 9pm入場費：成人$119、青少年$100、兒童$85連主題館入場費：成人$181、青少年$150、兒童$131交通：於濟州市外巴士客運站搭乘前往英語教育都市的巴士，於雪綠茶博物館站下車後步行即抵
Hello Kitty韓國屋企
全場最期待的一刻，就係Kitty出嚟同大家影相。在韓國Kitty都要係長腿！
Hello Kitty最新一個落腳點係上年12月於濟州開幕的Hello Kitty Island。樓高三層，有兩層係重現Hello Kitty屋企嘅Hello Kitty House，見到清一色粉紅色加貓頭家具，加埋頂樓花園、歷史館同美術館等等，Kitty迷淨係影相都影到手軟！二樓有Hello Kitty Café，其實同首爾嗰間一樣，唔食無損失，留個錢去紀念品店使錢好過！好多產品都係濟州限定，去日本都搵唔到！呢個Kitty館雖然唔係最大型最靚，不過喺濟州一片綠油油中，見到亮眼嘅粉紅色，女仔一定好開心。
Hello Kitty Café經常滿座，食物裝潢都同首爾嗰間一樣，為自拍打卡食件cake就夠。
Hello Kitty House內嘅梳化、地氈、鏡全部係貓樣，女fans個個當正自己屋企，攤梳化、照鏡，乜都有。
Hello Kitty Museum同日本個Sanrio Land唔同，可以玩嘅嘢唔多，主打係製作精美嘅Kitty佈置，個個都係fans影相靚位。
Hello Kitty Island Museum& Café地址：濟州島西歸浦市安德面上倉裡1963-2電話：（+82）64-792-6114網址：
http://www.hellokittyisland.co.kr
開放時間：9-5月9am-6pm，6-8月9am-8pm入場費：成人$92、學生$85、小童$69交通：由西歸浦市中心乘的士約$42
旅遊資料簽證：持BNO或特區護照免簽證機票：釜山航空每日均有航班來回香港釜山，晚機去晚機返，票價由$3,240起。每天有十多班航班，由金海機場飛往濟州，約$523一程，查詢：3489 6320或
http://www.airbusan.com
匯率：1,000韓圜兌7.7港元（文中價錢以此匯率計算）氣候：7月平均氣溫為攝氏24-30度鳴謝：韓國觀光公社，釜山航空，釜山觀光公社，濟州特別自治道，濟州觀光公社
撰文：關錦雯 攝影：胡春輝
