有次家庭聚會，講起恐龍。我第一時間想到電影《侏儸紀公園》，表弟是《數碼暴龍》、姪仔就話《恐龍大時代》。年代變，恐龍好似越變越可愛。人人話first impression最重要，我的初體驗來自《侏》入面嗰隻識開門的恐龍，童年陰影到現在還記得，好想帶姪仔認識那種要驚又想睇的美好回憶。與其回顧舊電影，不如帶佢去親歷其境，收窄兩代「龍」溝。仲未諗到暑假帶仔仔去邊？考慮嚇今年3月開幕的曼谷Dinosaur Planet，入面嘅恐龍，肯定真過之前新荔園條膠龍。
年初網上一條短片廣傳，貨車尾放了隻識郁的暴龍，大搖大擺走在曼谷街頭，原來是新主題公園的預告，未開幕先轟動。難得唔使去華欣芭堤雅，樂園就位於市中心黃金地段，BTS Phrom Phong站一出，就見到大大個摩天輪，仲有將條頸伸到2樓咁高的腕龍。號稱用了5億泰銖（約1.1億港元）建造，園區卻只有約12,000平方米（約3.5個標準足球場），比上年臨時搭建的荔園還細。咁多錢，用咗喺邊？樂園公關Shin表示：「睇嚇我哋啲龍，好真㗎！」
1:1巨龍 曉行識走會嚇人
聽落好笑，但一諗起新荔園恐龍屋門外隻膠龍，又不無道理。由門口到園內，有150隻識郁的模型恐龍，散落在草叢、都是1:1按原本體形製作，細緻到連皮的紋理都清晰可見，摸上去也相當有質感，又識眨眼、擺尾，相當犀利。還以為所有龍都是企定定，正想來張selfie，忽然一隻識行識走的速龍衝過來，不禁嚇了一跳，Shin這時笑了笑，「都是由職員扮的。」呢隻就帶點A貨味，屁股位的拉鏈清晰可見，不過勝在夠落力，一時兇人、一時滾地扮可愛，引得小朋友哈哈笑。但諗落曼谷攝氏40幾度高溫，還要著住咁大件恐龍服實熱到癲，不禁讚一句：「臨時演員都係演員！」
園區雖然的骰，但都有八大主題區。身邊不少朋友都表示想去，卻對園內設施、是否啱小朋友玩等有疑問，加上600泰銖（約133港元）入場費話平唔平，想決定去唔去，可以參考以下介紹。
場內有職員扮演恐龍，走動時連尾都識郁，一時嚇人一時賣萌，相當專業。
越野車、暴龍出沒注意的告示牌，很有《侏儸紀公園》的味道。
一進場，見到兩隻巨型腕龍，條頸伸到2樓咁高。
機動遊戲
Dino Eye 摩天輪帶你去冰河時期
本應是園內最有噱頭的設施，特別是近年越來越多摩天輪採用巨型吊廂，要同三唔識七的人同廂，有如茶餐廳卡位要搭枱咁屈質。這裡難得每廂只有兩個座位，採用全透明設計，最高點離地50米（約12層樓高），轉一圈約10分鐘左右。以為又係睇景咁悶？起動後，先有恐龍衝向著你猛叫，之後會進入冰河時期，到長毛象、老虎都出擊。設施要另外收費每位200銖（約45港元），不過現時畀錢都冇得玩，4月尾的時候一個吊廂著火，暫時停駛維修，幾時可以重新開放都仲未知！只剩下出入口位的「史前海洋世界區」開放，投影的魚龍會在牆上不時游過，地上放滿扮作氣泡的透明波，小朋友就當身處波波池咁，玩得興奮。
好玩度：★☆☆☆☆
公園的標誌性摩天輪，現時正進行維修，未知何時可重開。
Dino Eye入口處的波波池，小朋友至愛。
4D Deep World以地心探險為題，不過片段頗為沉悶，4D效果亦不足。
4D Deep World 我究竟睇咗乜
剛於5月才開幕的4D Deep World，進入後會坐上升降機造型的平台，左右兩邊播放動畫。據官方資料顯示，故事講述數百萬年前，存活於火山下的恐龍世界。但坐了5分鐘，除了聽唔明的泰文故事，恐龍只出現數十秒，被襲擊時也只是有「心意」地郁兩郁，大部份時間就望著一大片熔岩發呆，有點「我究竟睇咗啲乜」的感覺。
好玩度：★☆☆☆☆
Dino Farm的電動恐龍相當過癮，會按各種龍調校相應的步伐，雖說只限100磅以下人士參與，但不時見大人玩埋一份。
Dino Farm 騎龍龍回到侏儸紀
一地泥沙扮考古的化石區不是重點，騎得郁得的電動恐龍方是細路最愛。手執遙控，劍龍、三角龍化身坐騎，可前後左右移動，以5秒一步的龜速前進，不怕小朋友「墮」龍。
好玩度：★★★★☆
Raptor X-treme 逃避速龍追擊
經常玩密室逃脫，弱弱的場景佈置，令我往往不覺得有要逃走的衝動。想像你俾人困在籠內，有隻速龍追住你，要完成任務搵密碼先走得甩，咁先刺激！佈置成直升機失事，還要避過恐龍襲擊，同時又要在一堆貨櫃中，找回重要失物逃脫。開始時還會有泰文影片解說，不過who cares？一開門見到速龍砰砰聲追過來，大家嚇得雞飛狗走。場景、音效做得相當逼真，演員夠賣力營造緊張感覺，可說是玩過最好的逃脫遊戲。唯一可惜是每次有近20個遊客參加，人流行得太慢，可憐速龍有時跑到人前，咬你又唔係走又唔係，惟有企定張牙舞爪，好似等紅綠燈過馬路般無奈。雖然如此，依然是全園最好玩的設施，留意13歲以上先玩得。
好玩度：★★★★★
Raptor X-treme是最受歡迎的遊戲，假日來玩要排隊。
遊戲設計一流，可惜人流行得慢，「速龍哥」惟有無奈企定定張牙舞爪，等遊人走掉再追過。
Dino Square有不少恐龍小食，當中這個劍龍麵包造型趣致。
Dino Square 唞一唞將劍龍食落肚
基本上是美食與手信區，由七彩恐龍蛋、恐龍窩夫等都有。推薦一試恐龍奶黃包，包的一邊做成劍龍脊上的小三角，用北海道牛奶做麵粉，食落香軟。
教育區
Dinosaur District內的化石，有如博物館內展出的一樣逼真。
Dinosaur District 超逼真化石
就如入了科學館，介紹恐龍的歷史，再到恐龍骨展覽。1:1的腕龍、三角龍、劍龍骨，跟自然博物館內的化石一模一樣。恐龍骨是不是真的？「當然是假的了！」Shin笑笑口答道，但顯然為幾可亂真的程度自豪。再進就是Dino Lab展區，有點像《侏儸紀世界》裡培植恐龍蛋的實驗室。忽然場內的燈一暗，模擬有暴龍來襲，搵自己骨肉，扮作科學家的講解員叫大家伏下，最後當然化險為夷，職員甚有戲，將平白的恐龍介紹變得生動。
好玩度：★★★☆☆
Stars of Dino的恐龍很像真，沒膠味。
Stars of Dino 搵恐龍自拍
堪稱是恐龍模型區，散落在草叢上，有三疊紀、侏儸紀和白堊紀的恐龍，由暴龍到鴨冠龍、劍龍，全部識動識叫，相當逼真，是園內的selfie位。
好玩度：★★★☆☆
火山劇場沒有大成本製作，但識笑識跳的恐龍，就𠱁得小朋友相當開心。
The Great Volcano andExtinction Live Show 小本製作劇場
每晚7、8及9點都有人扮的恐龍出來表演，講述火山爆發與恐龍絕種的故事。如果抱著去迪士尼、環球影城的睇騷標準注定失望，這裡只是小本製作，但睇住恐龍跳舞其實幾好笑，短短哋表演大約10分鐘左右，當係娛樂一下都好。
好玩度：★★★☆☆
Dinosaur Planet
地址：EM Sphere,between Sukhumvit Sois22 and24,Wattana,Bangkok10110
開放時間：上午10時至下午10時
入場費：成人600泰銖（約133港元）、小童400泰銖（約88港元）、90cm以下小童免費
查詢：
http://www.dinosaurplanet.net
交通：乘坐空鐵BTS至Phrom Phong站，步行3分鐘
Travel Memo
簽證：持特區護照或BNO，可免簽證停留90日。（查詢：泰國領事館25216481）
航班：乘泰航前往曼谷，來回機票約1,185港元起（已連稅）。
記者：甄俊宇
攝影：林栢鈞
編輯：黃仲兒
美術：楊永昌
from:
http://hk.apple.nextmedia ... 160616/19655369
