王賢誌（Vinci）噚日喺上環舉行慈善DVD發佈會，為廣華醫院重建籌款，請咗好多朋友到場支持，黃婉曼、馬詩慧、賭王三太陳婉珍、盛品儒同未婚妻蔡一鳳，連傳足多年來都傳不和嘅陳志雲都有嚟。當年Vinci炮轟大台，同當時做高層嘅志雲反曬面，不過噚日兩人見面就好老友，仲同埋「迷雲黨」嘅王喜、又係被志雲踢出商台嘅吳綺莉大合照。
志云：冇事啦
志雲雖然冇期上Vinci個節目做嘉賓，不過佢都獻計，喺最後一集邀請朋友以短訊問Vinci問題，志雲都有參與。Vinci話當年恩怨已冇曬事，問番志雲，佢話：「冇事啦，當年係少傾偈，𠵱家都有出嚟食飯。」
至於吳綺莉見到志雲嗰陣，飛撲埋去又攬又蹺手，王喜笑謂當年是非人物都集合曬，吳綺莉仲話：「其實Stephen（志雲）最愛我。」問到志雲係咪都冇曬仇？佢話：「係囉，都冇嘢。」
盛品儒話希望可以早啲結婚，仲話一定要生仔喎！
早前宣佈會同蔡一鳳明年結婚嘅盛品儒，直言想快少少，仲話一定要生小朋友：「結婚為咗組織家庭。」不過最近成日同未婚妻出嚟，係咪被人贒實？盛品儒笑言係自我軟禁。同場賭王三太陳婉珍話超雲未有新戀情，要享受嚇單身先，又讚超雲好乖成日陪自己。
撰文：馮仁昭
From:
http://hk.apple.nextmedia ... 140725/18810967
