熊黛林自認愛珠寶，仲話男人送珠寶會快啲打動到自己，真係好坦白。
鄺美雲有扮投資嘅太陽國際拍賣行，噚晚喺中環舉行晚宴，古天樂、吳奇隆、馬德鐘夫婦等到賀，著透視衫嘅顧紀筠仲疑似「缽仔糕」走位㖭。而熊黛林（Lynn）佩戴逾億珠寶行騷，見記者時就戴逾4,500萬嘅祖母綠鑽石套裝，問男士送珠寶係咪易打動你？Lynn好坦白話：「呢啲快啲打動我，女仔鍾意珠寶，如果男士以呢個為目標努力做嘢，買我鍾意嘅珠寶會加好多分。」
狄波拉為栢芝護航
吳奇隆被問到會否競投珠寶送女友劉詩詩？佢話：「未知，有都唔話你知。」會否送戒指？佢又玩神秘話：「未諗，送大家會睇到。」對於唔少藝人結婚生仔，佢就坦言未有計劃；另外狄波拉對於鄭佩佩插張栢芝唔專業，拉姑為前新抱講好話：「唔係咁，佢工作咁多年應該唔會，不過由我講唔好。」
至於老闆鄺美雲戴3千萬珠寶現身，但唔見男友「樓神」林達民撐場，鄺美雲話：「佢忙地產同賣樓，希望焦點喺拍賣行上，下月27日會有首場拍賣會。」另外，古天樂到場同鄺美雲影相時，突然有位女士做攝石人黐古仔合照。同場仲有45歲嘅戴蘊慧，佢戴著草帽襯露肩裙，打扮青春，果然係最美麗嘅外婆。
45歲嘅戴蘊慧打扮青春，不負最美麗外婆之名。
鄺美雲有份投資嘅拍賣行搞晚宴，丁子高、馬德鐘夫婦亦畀面撐場。
from:
http://hk.apple.nextmedia ... 140627/18777816
