從藝人關楚耀（Kelvin）口中說出「人冇死過，唔會知活着嘅可貴」這句說話，有如驚濤駭浪後重獲新生的心情，2009年Kelvin因在日本藏毒，事業直插谷底與死神相依，事過境遷，如今事業重上軌道，難怪Kelvin話對「死」有更深層次的體會。
Kelvin指入行多年，經歷過起跌，最大得着係珍惜機會。
入行咁多年，最大嘅得着係「珍惜機會」，聽落好似好老套，但如果你唔經歷過死亡，唔識得後悔，唔會知原來「機會」唔係必然。好慶幸，近年嘅工作機會多咗，音樂上公司又畀好大自由度我，畀機會我去做自己想做嘅音樂，所以今次搵咗樂隊Supper Moment合作，佢哋寫咗首歌《死去活來》畀我，「死去活來」呢四個字，聽落好似好負面，但對我嚟講，其實好正面，因為不論我嘅感情、事業定人生都經歷過「死亡」，正因如此，先令我感受到活着嘅可貴。
有Job最緊要
事業上，以前初出道，公司安排好晒所有工作畀我，機會好易就有，但當發生咗東京嗰一件事後，絕對係標誌住我死去又活來嘅階段，依家諗番轉頭，能夠死過翻生真係好幸運，我當時冇諗過自己仲可以喺呢度發展，而且呢幾年多咗好多嘢做，冇理由唔把握o架？依家我好享受塞爆schedule嘅感覺，雖然有時會好忟點解會冇晒自己時間，但作為一個死過翻生嘅藝人，有「job」先係最緊要。
Kelvin2009年因藏毒事件，令事業直插谷底。
Kelvin對台模許維恩心生好感。
硬啜豬柳蛋
電影工作嚟講，發展得真係幾好，淨係呢一、兩年已經拍咗七至八套，不過好多人都只係留意我嘅情慾戲，反而想大家睇多啲我嘅演技，同埋，其實我同對手拍親熱戲前，有樣嘢一定要做，就係刷牙，但淨係我刷冇用，我會提供埋畀對手，但就曾經發生過一件事，令到我好難堪。有晚拍通宵，大家都肚餓，各自食咗啲嘢，我食咗個蘋果，對手食咗個豬柳蛋漢堡，到埋位我見佢嘴角有撻白色嘢，心諗究竟係咩嚟，未來得切反應導演就嗌「Action」，咩話？Action？舊豬柳蛋漢堡迎面而來，喺千鈞一髮之際，我即刻嗌停，叫佢抹走撻嘢先，呢一幕「我與豬柳蛋的親熱」真係難忘。
睇中許維恩
最近，我幫錢國偉拍緊一套電影，電影講述我喺台北飲醉酒後嘅一連串瘋狂事，咁去台北拍戲，當然有喺嗰度玩啦，不過其實我喺套戲入面係個唔蒲唔玩嘅人，所以話拍呢套戲都好考演技，至於我戲中的「女友」，係台灣模特兒叫許維恩，佢係我好喜歡嘅類型，而且佢份人好吸引，同佢接觸試過有觸電嘅感覺，記得有場戲，我跣腳成個人跌咗落地，擦損咗左手手掌，係咁流血，佢第一時間衝埋嚟幫我包紮，當下好impress，佢好溫柔，我問佢你唔怕血咩？佢反而話止血最緊要，驚我會細菌感染，依家見到手上疤痕，就會諗起佢。
三年冇拍拖
講到感情事，男男女女都好，總會有遇過一啲不如意嘅事，有種直頭想死嘅感覺，我曾經遇過一個女仔，覺得同佢好夾，而且覺得我哋係可以過下半生，所以我好投入付出，但時間耐咗，愈係深入了解，愈發覺原來同自己當初所諗嘅好唔同，而且之間有太多遷就位，感覺到其實同佢未必啱，雖然我錄歌嘅時候，冇刻意投入呢件事落去，但當我第一次收到歌詞時，我先發現原來我有兩、三年冇拍拖，好耐冇試過戀愛嘅滋味，搞到我突然間好想重拾戀愛嘅感覺，好期待會遇到一個適合嘅女仔，順理成章咁發展落去。
追前多嘢諗
其實幾年冇拍拖，會發現自己嘅愛情觀有好大改變，最明顯係冇以前咁敢愛敢恨，以前見到個女仔啱Feel，就會去追，但可能因為大個咗，追女仔之前會諗多咗好多嘢，例如：如果我要識佢，應該要點樣同佢發展呢？如果我份工太忙，佢又會唔會體諒我呢？雖然咁多嘢諗可能會阻礙到自己。
後記：大隻先夠型
Kelvin去年為個唱練得一身好肌肉，事隔半年多，眼見其手瓜依然粗厚，但他卻慨嘆：「唉，細舊咗喇，依家好忙，少咗練。」說罷他拍一拍骨瘦嶙峋的筆者說：「你知唔知我以前仲瘦過你，練下就得o架喇，信我，男仔要大隻啲先型。」共勉之。
Hair：Jackal Wong@Marek art of hair
Makeup：Mon Chun
Wardrobe：Le Coq Sportif
Venue：Lupa
From:
http://orientaldaily.on.c ... /00282_065.html
