關楚耀噚日同韓籍女友，喺銅鑼灣街頭咬耳仔纏綿。
【銅鑼灣】噚日係關楚耀嘅韓國女友Miu Kim生日，身為男友嘅關楚耀，梗係諗節目同女友慶祝喇！噚日見到佢哋兩個十指緊扣咁喺銅鑼灣禮頓道出現，話晒𠵱家係熱戀中，一舉一動梗係sweet到爆喇，喺等過紅綠燈嗰陣，女方已經好熱情咁挨住男友嘅膊頭，仲見到佢喺男友耳邊喁喁細語，講講吓仲錫咗佢面珠一啖，關楚耀梗係好受落喇！
之後佢哋兩個行咗去時代廣場嘅city'super，行咗冇耐佢哋分開咗，關楚耀即刻住家男上身，見佢專攻啲凍肉、刺身等等，睇嚟佢哋夜晚諗住喺屋企玩煮飯仔慶祝生日，隔咗15分鐘左右，女友會合關楚耀，最後佢哋發現記者，女友當然表現怕醜，仲匿埋喺男友後面，之後行返去利園二期拎車走人。
採訪、攝影：朱志聰、羅德光
from:
http://hk.apple.nextmedia ... 160312/19526038
