關楚耀蜜運風騷跳台

關楚耀有愛情滋潤，演唱時一度high到跳台。

關楚耀、林曉培及組合Soler昨日在尖沙嘴宣傳下月27日於九展舉行的「Amase Live」演唱會，他們現場合唱《愛情陷阱》，蜜運中的關楚耀情緒高漲，唱到跳下台兼拋簽名海報。前日被影到和韓國女友Miu Kim拍拖遊銅鑼灣的關楚耀，直言單身了好一段日子，有新戀情而心花怒放，他風騷自爆：「煮甜品特別好味，個人好起勁，好似頭先唱歌，啲細胞特別有反應，就要落台。」他並謂家人對女友評價不俗。

Soler和林曉培已是第二次合作，今次加入關楚耀，Dino笑說：「我想佢搞亂檔呀！好似頭先咁跳落台，不過唔好太危險。」Julio則透露以前唱歌技巧出錯，令聲線受損，現跟老師學唱歌改掉壞習慣。

採訪：盧妹
攝影：陳慧安
from:http://hk.apple.nextmedia ... 160313/19527267

【買薯仔】

關楚耀前晚同女友去超市買嘢。

關楚耀（Kelvin）上年被踢爆同來自韓國、影過唔少性感內衣相嘅索模Miu Kim拍拖，仲喺踏入2016年嗰刻，相約喺中環倒數，啜住過年，之後Kelvin亦冇將戀情收收埋埋，大方同女友拍拖四圍去，不過據知Miu Kim唔係全部時間留喺香港，所以每次返嚟香港，一對熱戀中嘅戀人都會爭取時間見面。

【齊隊啤】

關楚耀同女友Miu Kim（左）前晚喺一間pizza店嘆啤酒。

【打招呼】

關楚耀食食吓串燒就發現記者，仲同記者say hi。

食完串燒逛超市

前日先俾記者撞到陪女友過生日嘅Kelvin，孖住女友喺銅鑼灣十指緊扣出現，估唔到馮仁昭前晚又喺大坑發現呢對癡纏戀人喎。前晚約8點幾，Kelvin同女友喺大坑一間食pizza嘅舖頭打躉，其間兩人同時叫了啤酒飲，一人一杯嘆住pizza咁傾偈，坐咗一粒鐘先走，然後再去附近一間舖頭食串燒，Kelvin食食吓仲發現記者，不過心情好好嘅佢不但冇嬲嬲豬，仲同記者say hi，食完嘢仲做廿四孝男友同女友逛超級市場，之但係兩人逛咗一大輪，最後只買咗薯仔同菜，整乜嘢？煲湯？我諗只要係女友整，Kelvin食乜都咁開心啦！

撰文：馮仁昭
from:http://hk.apple.nextmedia ... 160314/19528175