阿詩噚日話搞演唱會要練分身術，連贊助都要自己搵。
何韻詩自資嘅「18種香港」演唱會後日開騷，之前勇敢企出嚟撐雨傘運動嘅佢，似乎嚇倒某啲唱片公司同歌手，令佢哋覺得阿詩生人勿近，噚日阿詩喺觀塘綵排時話：「除咗忙綵排，仲要練分身術，搵人贊助飯盒都要親自出馬，搵幕後贊助容易啲，但搵嘉賓難！」
「18種香港」演唱會後日開騷，阿詩同幕後班底忙住綵排。
借外國勢力
問到係咪有藝人怕敏感？阿詩坦言：「我覺得會，如果知某啲公司有顧慮，唔會搵嗰啲歌手，但我唔知顧慮啲乜，完全冇任何話題牽涉政治成份，但大家聽到就雞飛狗走，好得人驚！當大家驚到自己先去落閘，審查番自己先，係一個得人驚嘅狀況，結果自己要搵啲向國際方面發展，外面渠道搵嘉賓。」記者笑阿詩借助外國勢力，佢笑住話：「真係要，都唔明呀，唱隻歌啫！」
有冇覺得被人扣帽子，何韻詩等於政治同敏感？阿詩話：「都有咁情況，尤其見到近排成個環境有荒謬嘢發生。」問到開騷會唔會講荒謬嘢？阿詩話：「呢個騷唔係講自己嘢，係講香港發生嘅事，用嘅方法唔會畫公仔畫出腸，會隱喻啲。」
撰文：馮仁昭
from:
http://hk.apple.nextmedia ... 150817/19258331
