TVB熱播中的《星夢傳奇》成功將藝人打造為歌星，帶挈浮沉多年的二打六上位，不少商場騷都曾向TVB問價，一眾「星夢幫」本來可以乘機搵番筆。
不過，早前非戲劇組的總監余詠珊以「專心比賽」為理由，下令「星夢幫」藝人在比賽期間不能接TVB以外的工作，令眾人見財化水。
據知此事辣㷫掌管藝人的高層樂易玲，認為余詠珊踩過界，不過余有集團總經理李寶安力撐，樂易玲亦只能谷住度氣。TVB賺少啲好小事，但最慘是鄭俊弘、羅鈞滿、姚兵有錢冇得搵，難怪眾星怨聲載道。
宿敵冇偈傾
上周五（4日）TVB台慶亮燈，樂易玲寧願同曾與自己傳不和嘅曾勵珍傾偈，都唔理余詠珊。
《星夢傳奇》自七月播映以來，發掘了不少「唱得」的藝人，令浮沉多年的鄭俊弘、羅鈞滿、姚兵及鬼妹陳明恩彈起。本來食住《星夢》潮，「星夢幫」錢途無限，不過余詠珊卻突然下令已簽TVB經理人合約的藝員，比賽期間不准外出接job搵錢，此舉變相益了非親生女的鬼妹（陳明恩），幾個月來接騷接到手軟，豬籠入水。
入TVB以來，余詠珊一直得到李寶安（左）撐腰，在TVB可說是權傾朝野。
鄭俊弘入行多年，參加《星夢》才換來搵錢機會，可惜卻蜑家雞見水。
李寶安撐腰
崔建邦曾是棄將，但近年再次成為大騷司儀，早前更拍住王祖藍主持港姐。
「Sandy（余詠珊）同『星夢幫』講明，話要佢哋專心比賽，總決賽前都唔准佢哋接出面嘅job，搞到樂小姐（指樂易玲）躁晒。樂小姐都同公司反映過，話咁多商場騷點名搵『星夢幫』，做乜有錢唔賺，不過李寶安撐Sandy（余詠珊），樂小姐惟有收聲。」知情者透露。
其實，自余詠珊去年入主TVB後已經搞了不少動作，例如她力捧昔日有線愛將黃翠如首次拍劇就做《心路GPS》女主角，雖然觀眾劣評如潮，不過黃依然繼續連拍三劇，包括︰《舌劍上的公堂》、《愛我請留言》及《陪着你走》。
相反，樂易玲的愛將如黃智雯、徐子珊等，則捱足兩、三年閒角才開始有得擔正，樂易玲自然不是味兒，近日她重新招攬崔建邦做主持，無非藉此抗衡余詠珊硬捧愛將洪永城及陸浩明做主持，不讓余獨大。
星夢幫敢怒不敢言
黃翠如加入TVB後立即做女主角，洪永城亦獨立主持《走過烽火大地》。後來兩人主持兩輯《走過浮華大地》，令不少老臣子眼紅。
而一班見財化水的「星夢幫」，面對余的弄權都敢怒不敢言。本周一（7日），《星夢》最後五強出席記招活動中，談到因參賽禁接job，「高分王」鄭俊弘無奈地說：「係呀！公司要我專心比賽。（冇咗好多搵錢機會？）希望之後搵得番啦！（有冇同公司反映？）公司安排都係為我好。」
至於羅鈞滿就呻爆：「我都冇辦法，我係公司嘅人。好彩之前接落嘅工作都有得做，禮拜二（8日）我都要做一個annual dinner嘅嘉賓。」而捱了多年的姚兵就話：「一個月前經理人同我講過，因為公司要我哋專心比賽。（你搵少好多喎？）隨緣啦！」至於非親生女陳明恩，亦直認冷手執個熱煎堆：「近排嘅工作好密，入行以來最忙呢排，係《星夢》帶俾我嘅。最近忙錄音，年尾我會出碟。」
樂易玲把口就話撐星夢幫專心比賽，但被問到唔准接job係邊個主意，就暗示係余詠珊意思：「之前《巨星》都係比賽完咗先俾接job。（《巨星》係新人參賽，性質唔同？）唔好着眼於眼前嘅錢，要長遠睇。（係咪Sandy講先，李寶安又認同唔准接job呀？）嗯……開會時大家講，站喺Sandy立場都啱嘅。」
本刊致電余詠珊求證，惟她至截稿前仍未回覆。
陳明恩：入行以來最忙呢排！（真實對白）
鬼妹陳明恩同鄭俊弘等星夢幫唔同，冇簽俾TVB，於是接到其他星夢幫嘅工作。
近期陳明恩一星期最少接一個騷，又和Bob合作拍廣告，吸金力大幅提升。
踩過界搶人余詠珊自去年加入TVB後，搞作多多，雖然身份是非戲劇組總監，但她單是去年已經兩次踩過界踩入樂易玲主管的藝員部，為負責替藝員度期演出的藝員部同事帶來很多麻煩。
頭炮搶紅星
去年7月的《玩轉三周1/2》（左）是余詠珊過檔後首個節目，由於要打響頭炮，節目找來陳豪、胡杏兒、黎耀祥等人演出，由於沒有事先張揚，玩殘為紅星度期的藝員部。
停廠撐港姐
去年8月港姐決賽，余詠珊要所有拍緊劇嘅廠停工，令全部小生花旦可以出席撐場，做法史無前例，只係苦了一班冇心睇騷的阿哥阿姐。他們惟有吹水打機過日辰。
