陳茵媺和諸葛紫岐兩個懷胎七月的幸福女人，陀B後昨日分別首次出席活動頴銀，同樣獲豐厚酬勞。收足20萬酬勞的茵媺識做地自爆為陳豪懷男嬰，諸葛則賣關子不肯透露胎兒性別，只晒6卡巨鑽，並謂老公薛嘉麟日日為她整嘢食。
陳茵媺昨穿上黑色露背裙，腳踏5吋高踭鞋到銅鑼灣為手錶專門店主持剪綵儀式，雖懷胎七個月，但茵媺依然纖瘦，戴着5卡婚戒滿臉笑容剪綵，據知平時出活動酬勞約5萬的她，今趟收20萬。由於茵媺腹大便便，除有兩經理人及茵媺爸爸陪出席外，大會還請來四名保安貼身保護。至於懷胎快七個月的諸葛紫岐，則在沙田出席鞋履品牌活動，同樣收20萬酬勞的她穿兩吋高踭鞋顯得小心翼翼，並大晒手上6卡巨鑽。
茵媺昨日百無禁忌剪綵，她接受訪問被問到懷胎首個活動酬勞是否更高時，她笑言：「開心價啦！三個幾月冇做嘢，我係工作狂，想同大家見面。」
懷胎七個月的陳茵媺，昨戴住5卡鑽石婚戒出席活動，身形依然纖瘦，笑容甜美。
「我係阿仔唯一女人」
之前一直保密BB性別的茵媺是日大方透露懷的是男嬰，大約聖誕或新年在港出世，且不會擇日生，她說：「想親身經歷，好好享受過程，但得唔得交畀醫生決定，BB幾時見父母就幾時出嚟，由佢決定。」陳豪知道懷男嬰可有特別開心？茵媺說：「係我特別開心，雖然仔女都冇所謂，但至少喺阿仔拍拖前我係佢唯一嘅女人。」陳豪亦將陪她入產房。
陳茵媺公佈為陳豪懷男嬰，她笑言比老公更開心。
諸葛紫岐同樣懷孕七個月，幸福雙下巴與6卡鑽戒（小圖）同樣搶鏡。
諸葛紫岐聽從老公薛嘉麟吩咐，專心陀B。
茵媺昨獲大批保安護駕，眾人阻止途人的手推車接近她。
另一邊廂，大肚人妻諸葛紫岐昨與萬綺雯在沙田出席鞋履品牌活動，諸葛透露只重了十多磅，未試過嘔吐，頭數個月食量不多，閒時以音樂跟BB進行胎教，問到是仔還是女？諸葛避而不談，只說：「遲啲先講，總之12月尾都知啦。」之前在溫哥華被拍得買男嬰衫，她亦承認：「都有，奶嘴、奶樽都買好多，遲啲咪知囉。」諸葛透露暫定在港生，方便家人照顧，之前在溫哥華安胎一段時間，但返港後因空氣較差，有點不舒服，問到老公是否很緊張？她冧爆說：「佢好sweet，照顧得我好好，唔使送嘢畀我，佢日日整嘢畀我食，又成日同我傾BB嘢。」
諸葛預產期為新年
至於預產期，諸葛表示在新年前後，得知茵媺懷男嬰，亦公開恭喜對方。而近日看到雙非童來港爭幼稚園學額，諸葛說：「之前冇諗呢啲，𠵱家睇見新聞真係滴汗，老公話生咗再諗，我聽聞陀B已經要報小學，老公就叫我專心陀B，其他嘢佢會搞掂。」
採訪：卓寶花、溫敏芝
攝影：黃偉雄、黃文偉
from:
http://hk.apple.nextmedia ... 131009/18455347
