老闆娘諸葛（中）率領旗下藝人莊端兒（左）同黎美言出席春茗。
諸葛紫岐（Marie）因為盡心盡力搞星韜國際娛樂公司，搞到人又瘦晒，冇時間陪屋企人，早前更一度出現婚變危機，經過一番努力，終於一團和氣，難怪前晚諸葛喺紅磡公司春茗接受訪問時感慨咁話：「2015年酸甜苦辣都有，不過已經過去，今年大展鴻圖。」
Marie話公司正籌備開新戲：「希望5月可以開拍，𠵱家已經籌備緊，3月中會搞歌唱比賽，簽歌手，𠵱家公司全部女仔，都想簽啲小鮮肉，我仲set咗個目標，希望可以賺到8位數，比上年更好。」Marie仲好大方咁話如果賺到就攞出嚟開心吓，同大家去旅行慶祝，分享成果。
四洲太子女戴凱欣同男友玩情侶裝。
戴凱欣唔急嫁
諸葛公司旗下4位女藝人呂晶晶、莊端兒、黎美言同黃倩婷都有現身，而四洲太子女戴凱欣就拖實男友撐場。
戴凱欣同男友着情侶裝出現，佢話覺得咁樣着好得意，問到咁sweet會唔會閃婚？戴凱欣話：「慢慢來，未計劃，唔會係今年嘅事，唔急，父母無催，唔想因為佢哋恨抱孫就咁快結，一步步來，搵到啱嘅人先結婚生BB。」
撰文：馮仁昭
馮仁昭
from:
http://hk.apple.nextmedia ... 160226/19505808
