四月熊黛林响微博晒尾指「分戒」，以「重新上路」四個字兜個圈宣布卸任天王嫂。在位七年，始終做唔成郭太，分手近半年，郭富城由苟芸慧到葉熙祺，愈揀愈嫩口，而熊黛林就話當佢搵到真正嘅Mr.Right，就會除低「分戒」宣示幸福。
因為工作關係，熊黛林唔可以成日戴住隻「分戒」，但上個禮拜二（九月十七日），《壹》仔見到佢同助手揸車落中環，熊黛林落車，助手就揸車走，一邊行一邊撥頭髮嘅熊黛林，兩隻尾指都唔見有「分戒」，見到《壹》仔影相，笑晒報料話去搵牙醫洗牙，之後就入咗都爹利街一座商業大廈。
非工作時間，熊黛林都冇戴「分戒」，差在幾時大大聲講俾大家聽。
我咁令！大把人追啦！
王菲宣布離婚，身為fans嘅熊黛林以《紅豆》歌詞支持偶像，又係嘅，大家都係容易受傷的女人。
上衣半透視，熊黛林好清涼。
上兩個禮拜熊黛林以嘉賓身份出席「仁濟杯」活動，純粹嚟支持慈善比賽，兩隻手指尾同樣乜都冇。
四月中，熊黛林公開左手尾指「分戒」相片，以「重新上路」暗示同郭富城七年情玩完，仲話要等到真正嘅幸福嚟到，先會除低隻戒指。
